कोथरूड पोलिसांनी ठोकल्या बेड्या
marathinews24.com
पुणे – शहरातील कोथरूड परिसरात दहशत निर्माण करणाऱ्या कुख्यात निलेश घायवळ टोळीतील दोघांना कोथरूड पोलिसांनी बेड्या ठोकल्या. संबंधित आरोपी मोक्काच्या गुन्ह्यात ते फरार होते. त्यांना ३१ डिसेंबरला पेट्रोलिंगदरम्यान अटक करण्यात आली. मनीष रामकृष्ण माथवड (वय २८, रा. शोभा संकुल अपार्टमेंट, गणेश कॉलनी, कोथरूड) आणि चिक्या उर्फ ओंकार शाम फाटक (वय २६, रा. संत ज्ञानेश्वर कॉलनी, कोथरूड) अशी अटक केलेल्या दोघांची नावे आहेत.
गर्दीचा फायदा घेउन महिलांचे दागिने चोरले – सविस्तर बातमी
दोघेही आरोपी निलेश घायवळ टोळीतील साथीदार असून कोथरूड पोलीस ठाण्यात त्यांच्यावर गंभीर स्वरूपाचे गुन्हे दाखल आहेत. त्यामुळे त्यांच्यावर मोक्का अंतर्गत कारवाई करण्यात आली होती. मोक्का दाखल झाल्यानंतर आरोपी पसार झाले होते. दरम्यान, तपास पथकातील पोलीस अंमलदार विष्णू राठोड व आकाश वाल्मिकी यांना आरोपी कोथरूड परिसरात येणार असल्याची खात्रीशीर माहिती मिळाली. त्या आधारे पोलिस उपनिरीक्षक मोहन चव्हाण यांच्यासह पथकाने ३१ डिसेंबरला सापळा रचून दोन्ही आरोपींना ताब्यात घेतले.
ही कामगिरी पोलिस उपायुक्त संभाजी कदम, सहायक पोलिस आयुक्त शीतल जानवे, वरिष्ठ पोलिस निरीक्षक संदीप देशमाने यांच्या मार्गदर्शनाखाली पोलिस निरीक्षक अनिल माने, मयूर पांढरे व प्रवीण मांडवकर यांच्या पथकाने ही कारवाई केली.
