बंडगार्डन पोलीस ठाण्यात गुन्हा दाखल
marathinews24.com
पुणे – धावत्या बसमध्ये पीएमपी वाहक महिलेवर प्रवासी तरुणाने चाकूने वार केल्याची घटना पुणे स्टेशन परिसरात घडली. याप्रकरणी बंडगार्डन पोलिसांनी प्रवासी तरुणाविरुद्ध गुन्हा दाखल केला. सुरेखा बळीराम भालेराव (वय ३८, सध्या रा. मुळशी, मूळ रा. मुखेड, नांदेड) असे जखमी झालेल्या महिलेचे नाव आहे. याबाबत भालेराव यांनी बंडगार्डन पोलीस ठाण्यात फिर्याद दिली आहे.
अतिक्रमण कारवाई करणाऱ्या निरीक्षकाला धक्काबुक्की – सविस्तर बातमी
पोलिसांनी दिलेल्या माहितीनुसार, १५ एुप्रिल राेजी महापालिका भवन ते विमाननगर मार्गावरील पीएमपी बस रात्री आठच्या सुमारास पुणे स्टेशन परिसरातील अलंकार चित्रपटगृह चौकातून निघाली होती. त्यावेळी भालेराव प्रवाशांचे तिकीट काढण्याचे काम करत होत्या. त्यावेळी प्रवासी तरुणाला त्यांनी तिकिट काढण्यास सांगितले. या कारणावरुन प्रवासी तरुणाने त्यांना शिवीगाळ करण्यास सुरुवात केली. भालेराव यांनी त्याला बसमधून खाली उतरण्यास सांगितले. या कारणावरुन प्रवासी तरुणाने त्यांच्या मांडीवर चाकूने वार केला. त्यानंतर प्रवासी तरुण बसमधून उडी मारुन पसार झाला. पसार झालेल्या तरुणाचा शोध घेण्यात येत असून, पाेलीस उपनिरीक्षक चव्हाण तपास करत आहेत.
