बंडगार्डन पोलीस ठाण्यात गुन्हा दाखल
marathinews24.com
पुणे – खासगी कंपनीत गुंतवणुकीच्या आमिषाने एका महिलेची १५ लाख रुपयांची फसवणूक करण्यात आल्याचा प्रकार उघडकीस आला. या प्रकरणी बंडगार्डन पोलिसांनी चौघांविरुद्ध गुन्हा दाखल केला. नितीन कुलकर्णी (वय ५१, रा. डहाणूकर काॅलनी, कोथरूड), शिरीष देशपांडे (वय ५७, रा. श्रेयनगर, छत्रपती संंभाजीनगर), गोकुळ थोरात (वय ५२, रा. छत्रपती संभाजीनगर), अक्षय गर्ग (वय ३५, रा. धानोरी, विश्रांतवाडी) अशी गुन्हा दाखल करण्यात आलेल्यांची नावे आहेत. याबाबत एका महिलेने बंडगार्डन पोलीस ठाण्यात फिर्याद दिली आहे.
ज्येष्ठ महिलेच्या सदनिकेतून एक लाखांचे दागिने चोरीला – सविस्तर बातमी
पोलिसांनी दिलेल्या माहितीनुसार, तक्रारदार ४४ वर्षीय महिला बंडगार्डन रस्त्यावरील एका सोसायटीत राहायला आहेत. आरोपींशी त्यांची अडीच वर्षांपूर्वी ओळख झाली होती. आरोपींनी त्यांना खासगी कंपनीत गुंतवणूक केल्यास चांगला परतावा देण्यात येईल, असे सांगितले. त्यानंतर महिलेने त्यांच्या खात्यात वेळोवेळी १५ लाख रुपये जमा केले. पैसे जमा केल्यानंतर त्यांना परतावा देण्यात आला नाही. फसवणूक झाल्याचे लक्षात आल्यानंतर महिलेने पोलिसांकडे तक्रार दिली. सहायक पोलीस निरीक्षक अभिजित चौगुले तपास करत आहेत.
