एरंडवणे भागात दुर्घटना
marathinews24.com
पुणे – इमारतीच्या छतावर प्लास्टिक टाकी बसविताना झालेल्या दुर्घटनेत टाकी कोसळून कामगाराचा मृत्यू झाल्याची घटना एरंडवणे भागातील एका सोसायटीत घडली. दुर्घटनेस जबाबदार ठरल्या प्रकरणी एका विरुद्ध डेक्कन पोलिसांनी गुन्हा दाखल केला. राहुल श्रीकांत सतनामी (वय २१, रा. रायकर मळा, धायरी, सिंहगड रस्ता) असे मृत्युमुखी पडलेल्या तरुणाचे नाव आहे. याबाबत त्याची आई सीमा (वय ४४) यांनी डेक्कन पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, एका विरुद्ध गुन्हा दाखल करण्यात आला आहे.
पुण्यात पारपत्र कार्यालयात बाँम्ब ठेवल्याची धमकी – सविस्तर बातमी
पोलिसांनी दिलेल्या माहितीनुसार, एरंडवणे परिसरातील गुलमोहोर अपार्टमेंटच्या आवारात रोगनिदान केंद्र (पॅथोलाॅजी लॅबोरटरी) आहे. रोगनिदान केंद्रात पाणी पुरवठा करण्यासाठी टाकी बसविण्याचे काम २० फेब्रुवारी रोजी दुपारी करण्यात येत होते. टाकी बसविण्यासाठी गजाचा आधार देण्यात आला होता. त्या वेळी गज तुटल्याने टाकी बसविणाऱ्या राहुल सतनामी याच्या अंगावर टाकी काेसळली. त्याला गंभीर दुखापत झाली. त्याला तातडीने खासगी रुग्णालयात दाखल करण्यात आले. उपचारादरम्यान त्याचा मृत्यू झाला. पोलीस उपनिरीक्षक भोसले तपास करत आहेत.
