दारू पितााना झालेल्या वादातून तरुणाचा खून

मुंढवा पोलीस ठाण्यात गुन्हा दाखल

marathinews24.com

पुणे – दारू पिताना झालेल्या वादातून मित्राच्या डोक्यात दगड घालून खून करण्यात आल्याची घटना उघडकीस आली. याप्रकरणी एका अल्पवयीना ताब्यात घेण्यात आले. लोकेश मानसिंग ठोंबरे (वय ३०, रा. खाडेगाव, जि. नागपूर) असे खून झालेल्या तरुणाचे नाव आहे. पोलीस शिपाई प्रदीप पांडे यांनी मुंढवा पोलीस ठाण्यात फिर्याद दिली आहे.

टेम्पोच्या धडकेत दुचाकीस्वार तरुणाचा मृत्यू – सविस्तर बातमी

पोलिसांनी दिलेल्या माहितीनुसार, लोकेश आणि अल्पवयीन आरोपी हे मित्र आहेत. गुुरुवारी (७ मे) दुपारी दोघे जण घोरपडीतील बी. टी. कवडे रस्ता परिसरात असलेल्या मोकळ्या जागेत दारू पित होते. त्या वेळी त्यांच्यात वाद झाले. वादातून अल्पवयीनाने ठोंबरे याच्या डाेक्यात दगड घालून खून केला. त्यानंतर वरिष्ठ पोलीस निरीक्षक स्मिता वासनिक घटनास्थळी भेट दिली. पसार झालेल्या अल्पवयीनाला ताब्यात घेण्यात आले. सहायक पोलीस निरीक्षक पिंगुवाले तपास करत आहेत.

सोमवार पेठ पोलीस वसाहतीत घरफोडी

पुणे-सोमवार पेठेतील पाेलीस वसाहतीतील घरातून चोरट्यांनी सात लाख ४० हजार रुपयांचे सोन्याचे दागिने चोरून नेल्याचा प्रकार उघडकीस आला. या प्रकरणी चोरट्यांविरुद्ध समर्थ पोलिसांनी गुन्हा दाखल केला. याबाबत एका महिलेने फिर्याद दिली आहे.

पोलिसांनी दिलेल्या माहितीनुसार, सोमवार पेठेतील पोलीस वसाहतीतील इमारत क्रमांक पाचमध्ये तक्रारदार महिला राहायला आहे. चोरट्यांनी घराचा दरवाजा बंद असताना आत प्रवेश केला. कपाटातून सात लाख ४० हजार रुपयांचे सोन्याचे दागिने चोरून नेल्याचा प्रकार नुकताच उघडकीस आला. दागिने चोरीला गेल्याचा प्रकार उघडकीस आल्यानंतर महिलेने पोलिसांकडे तक्रार दिली. पोलीस वसाहतीतील घरातून दागिने चोरीला गेल्याचा प्रकार उघडकीस आल्यानंतर आश्चर्य व्यक्त केले जात आहे. चोरटा माहितगार असल्याची शक्यता पोलिसांनी व्यक्त केली असून, सहायक पोलीस निरीक्षक राऊत तपास करत आहेत.