नगर रस्त्यावरील अपघात
marathinews24.com
पुणे – ट्रॅक्टरच्या धडकेत दुचाकीवरील सहप्रवासी तरुणाचा मृत्यू झाल्याची घटना नगर रस्त्यावर वडगाव शेरीत घडली. या प्रकरणी ट्रॅक्टर चालकाविरुद्ध विमानतळ पोलिसांनी गुन्हा दाखल केला. हरिबा बन्सीलाल भालेराव (वय २४, रा. एसआरए वसाहत, विमाननगर) असे मृत्युमुखी पडलेल्या दुचाकीस्वाराचे नाव आहे. या प्रकरणी ट्रॅक्टर चालकाविरुद्ध गुन्हा दाखल करण्यात आला आहे. याबाबत प्रवीण गोकुळ नाईक (वय २९, रा. छत्रपती संभाजी चौक, भाजी मंडईजवळ, चंदननगर) याने विमानतळ पोलीस ठाण्यात फिर्याद दिली आहे.
कात्रजमध्ये ओैषध दुकानाचे कुलूप तोडून रोकड चोरी – सविस्तर बातमी
पोलिसांनी दिलेल्या माहितीनुसार, दुचाकीस्वार प्रवीण आणि त्याचा मित्र हरिबा हे रविवारी (८ फेब्रुवारी) दुपारी दोनच्या सुमारास नगर रस्त्यावरुन निघाले होते. वडगाव शेरी परिसरात सिग्नलपासून काही अंतरावर पाठीमागून आलेल्या भरधाव ट्रॅक्टरने दुचाकीला पाठीमागून धडक दिली. दुचाकीवरील सहप्रवासी हरिबा चाकाखाली सापडल्याने गंभीर जखमी झाला. दुचाकीस्वार प्रवीण फेकला गेल्याने त्याला दुखापत झाली. अपघातात गंभीर जखमी जालेल्या हरिबा याला तातडीने खासगी रुग्णालयात दाखल करण्यात आले. उपचारांपूर्वीच त्याचा मृत्यू झाला. अपघातानंतर पोलिसांनी ट्रॅक्टरचालक व्यंकटेश लोकेश राठोड (वय २८, रा. वडगाव शिंदे, लोहगाव रस्ता) याला ताब्यात घेतले असून, त्याला नोटीस बजाविण्यात आली आहे. पोलीस उपनिरीक्षक क्षीरसागर तपास करत आहेत.
