दुकानातील कर्मचाऱ्याविरुद्ध गुन्हा दाखल
marathinews24.com
पुणे – ओैषध विक्री दुकानातील कर्मचाऱ्याने १० लाख रुपयांचा अपहार केल्याचा प्रकार उघडकीस आला. याप्रकरणी स्वारगेट पोलिसांकडून ओैषध विक्री दुकानातील कर्मचाऱ्याविरुद्ध गुन्हा दाखल करण्यात आला आहे. याबाबत डाॅक्टरांनी स्वारगेट पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, आकाश रामधन ढगे (रा. येवलेवाडी) याच्याविरुद्ध गुन्हा दाखल करण्यात आला आहे.
गळा आवळून सुरक्षारक्षक साथीदाराचा खून – सविस्तर बातमी
पोलिसांनी दिलेल्या माहितीनुसार, तक्रारदार डाॅक्टरांचे स्वारगेट भागातील मुकुंदनगर परिसरात ओैषध विक्री दुकान आहे. या दुकानात ढगे हा फार्मसिस्ट म्हणून कामाला आहे. ओैषध विक्रीतून जमा झालेल्या रक्कमेचा ढगे याने वेळोवेळी अपहार केला. गेल्या वर्षभरात त्याने १० लाख २६ हजार रुपयांचा अपहार केल्याचे डाॅक्टरांनी दिलेल्या फिर्यादीत म्हटले आहे. पोलीस उपनिरीक्षक स्मिता पाटील तपास करत आहेत.
व्यावसायिकाची सायबर चोरट्यांकडून फसवणूक
खासगी बँकेकडे क्रेडीट कार्ड घेण्याबाबत विचारणा करणाऱ्या व्यावसायिकाची सायबर चोरट्यांनी सहा लाख ६२ हजार रुपयांची फसवणूक केल्याचा प्रकार उघडकीस आला आहे. याप्रकरणी सायबर चोरट्यांविरुद्ध सहकारनगर पोलिसांनी गुन्हा दाखल केला आहे. याबाबत व्यावसायिकाने सहकारनगर पोलीस ठाण्यात फिर्याद दिली आहे. तक्रारदार व्यावसायिक धनकवडीतील बालाजीनगर परिसरात राहायला आहेत. त्यांनी एका बँकेकडे क्रेडीट कार्ड मिळवण्यासाठी अर्ज केला होता. त्यानुसार व्यावसायिक स्वत:ची माहिती ऑनलाइन पद्धतीने भरत होते. त्यासाठी त्यांनी दुसऱ्या क्रेडीट कार्डचा वापर केला. या कार्डची माहिती देत असताना सायबर चोरट्यांनी त्यांच्या बँक खात्यातून ६ लाख ६२ हजार रुपये लांबविले. वरिष्ठ पाेलीस निरीक्षक विठ्ठल पवार तपास करत आहेत.
