खराडी पोलिसांनी केला गुन्हा दाखल
marathinews24.com
पुणे – संगणक अभियंता महिलेचा विनयभंग केल्या प्रकरणी एका माहिती-तंत्रज्ञान कंपनीतील एकाविरुद्ध खराडी पोलिसांनी गुन्हा दाखल केला. महिलेने खराडी पोलीस ठाण्यात फिर्याद दिली आहे. महिलेने दिलेल्या फिर्यादीनुसार कंपनीतील वरिष्ठ सहकाऱ्याविरुद्ध गुन्हा दाखल करण्यात आला आहे.
बनावट आयपीएस असल्याचे भासवून केली चप्पल-ज्वेलरी चोरी – सविस्तर बातमी
पोलिसांनी दिलेल्या माहितीनुसार, खराडी भागातील माहिती-तंत्रज्ञान कंपनीत महिला अभियंता आहे. आरोपी या कंपनीतील ‘टिम लिडर’ आहे. शुक्रवारी (३ ऑक्टोबर) पहाटे तीनच्या सुमारास आरोपीने कंपनीतील संगणक अभियंता महिलेला बोलावून घेतले. ‘मला तुझ्याशी बोलायचे आहे’, असे सांगून त्याने महिलेला तळमजल्यावरील वाहन तळावर नेले. वाहनतळावर त्याने मोटार लावली होती. महिलेला त्याने मोटारीत बसण्यास सांगितले. त्यानंतर आरोपीने ‘महिलेला तुझी पदोन्नती, वेतनवाढ करतो’, असे सांगितले. महिलेने त्याला नकार दिला. त्यावेळी आरोपीने महिलेशी अश्लील वर्तन केले. या घटनेनंतर घाबरलेल्या महिलेने कंपनीतील वरिष्ठ अधिकाऱ्यांना घटनेची माहिती दिली. महिलेने पाेलिसांकडे तक्रार दिल्यानंतर आराेपीविरुद्ध विनयभंगाचा गुन्हा दाखल करण्यात आला. सहायक पोलीस निरीक्षक मुबारक शेख तपास करत आहेत.
