सासूसह नातेवाईकांविरुद्ध गुन्हा
marathinews24.com
पुणे – जीन पँट परिधान केल्याने एका महिलेला सासूसह नातेवाईकांनी बेदम मारहाण केल्याची घटना पद्मावती भागातील तळजाई वसाहतीत घडली. याप्रकरणी सासूसह नातेवाईकांविरुद्ध गुन्हा दाखल करण्यात आला. याबाबत ३३ वर्षीय महिलेने सहकारनगर पोलीस ठाण्यात फिर्याद दिली आहे. तिने दिलेल्या फिर्यादीनुसार, सासू, दिरासह नातेवाईकांविरुद्ध गुन्हा दाखल करण्यात आला आहे.
पिस्तूल बाळगणारा सराईत अटकेत – सविस्तर बातमी
पोलिसांनी दिलेल्या माहितीनुसार, तक्रारदार महिलेला चार मुले आहेत. तिच्या पतीचे तीन वर्षांपूर्वी निधन झाले होते. पतीच्या निधनानंतर महिला कचरा वेचून उदरनिर्वाह करते. ३० डिसेंबर रोजी सायंकाळी महिलेने जीन पँट परिधान केली. त्यावेळी महिलेची मुलगी तेथे होती. काही वेळानंतर सासू तेथे आली. सुनेने जीन पँट परिधान केल्याचे पाहताच सासूने तिला शिवीगाळ करण्यास सुरुवात केली. जीन पंट परिधान केल्याने सासूने तिच्या चारित्र्याचा संशय घेतला. सासूने तिला मारहाण करण्यास सुरुवात केली. मारहाण सुरू असताना महिलेची मोठी मुलगी तेथे आली. तिने भांडणात मध्यस्थी करण्याऐवजी आईला मारहाण केली.
मारहाणीत महिला जमिनीवर पडली. दिराने तिला मारहाण केली. मारहाणीत तिचा हात फ्रॅक्चर झाला. ससून रुग्णालयात उपचार घेतल्यानंतर महिलेने पोलिसांकडे तक्रार दिली. महिलेची सासू, तिची विवाहित मुलगी, दिराविरुद्ध पोलिसांनी गुन्हा दाखल केला.
