लोणी काळभोरमधील गांजाचे कनेक्शन नंदुरबारपर्यंत
marathinews24.com
पुणे – शहरालगत लोणी काळभोर परिसरात अटक केलेल्या गांजा तस्करांचे कनेक्शन थेट नंदुरबारपर्यत असल्याचे तपासात उघडकीस आले आहे. याप्रकरणी विक्रीसाठी गांजा पुरवठा करणार्या दोघा सराईतांना गुन्हे शाखेच्या अमली विरोधी पथक एकने अटक केली आहे. आतापर्यंत याप्रकरणी चौघांना अटक केली असून, त्यांच्याकडून तब्बल २२ लाखांचा ४३ किलो गांजा जप्त केला आहे. दोन मोटारी, ५ मोबाइल असा ऐवजही जप्त केला आहे. मंगेश जाण्या पावरा (वय २९ रा. भोगावडे खुर्द, धडगाव नंदुरबार ) ज्ञानेश्वर मगन पावरा (वय २५ रा. सांगवी, शिरपूर, धुळे) अशी अटक केलेल्यांची नावे आहेत.
दरोड्याच्या तयारीतील सराईत टोळीला अटक – सविस्तर बातमी
लोणी काळभोर परिसरातील कदम वाक वस्तीनजीक गांजाची तस्करी करणारे अक्षय पोपटराव पाडुळे (वय ३१, रा. म्हाडा कॉलनी, हडपसर) आणि विशाल जाधव (वय २८ रा. हिंगणे मळा, हडपसर) यांना पोलिसांनी १४ फेबु्रवारीला अटक केली होती. त्यांच्याकडून ६ लाख ८८ हजारांचा ३५ किलो गांजा जप्त केला होता. याप्रकरणी आरोपींविरूद्ध लोणी काळभोर पोलीस ठाण्यात एनडीपीएस अॅक्टनुसार गुन्हा दाखल केला होता. संबंधित गुन्हा अमली पदार्थ विरोधी पथक एककडे वर्ग करण्यात आला होता. त्यानुसार पथकाने तपासाला गती दिली.
तांत्रिक विश्लेषणाद्वारे पथकाने नंदुरबार परिसरातील डोंगरदर्यातून सराईत गांजातस्कर आरोपी मंगेश पावरा याला ताब्यात घेतले. त्याच्याकडे तपासानंतर दुसरा आरोपी ज्ञानेश्वर पावरा याला नवी सांगवी शिरपूर धुळे परिसरातून ताब्यात घेण्यात आले. त्यांच्याकडून ९ किलो ४२० ग्रॅम गांजा, मोटार जप्त करण्यात आली. ही कामगिरी पोलीस आयुक्त अमितेश कुमार, सहआयुक्त रंजनकुमार शर्मा, अपर पोलीस आयुक्त पंकज देशमुख, उपायुक्त पिंगळे, एसीपी शंकर खटके, वरिष्ठ निरीक्षक वाहिद पठाण, सहायक पोलीस निरीक्षक अनिल सुरवसे, विठ्ठल साळुंखे, संजय राजे, रिहान पठाण, अमोल सरडे, नीलेश जाधव, विजय कांबळे, मंगेश गुंड, कदम, अक्षय शिर्के, शेलार यांनी केली.
