पोलीस आयुक्त अमितेश कुमार यांचा इशारा
marathinews24.com
पुणे – शहरात बेकायदा जाहिरातफलक, तसेच विविध राजकीय पक्षांच्या कार्यकर्त्यांकडून फलक लावण्याचे प्रकार वाढले आहेत. आठवडाभरात शहरातील सर्व बेकायदा फलक काढण्यात येणार असून, बेकायदा फलक लावणाऱ्यांविरुद्ध थेट गुन्हा करण्यात येईल, असा इशारा पोलीस आयुक्त अमितेश कुमार यांनी बुधवारी पत्रकार परिषदेत दिला. बेकायदा फलक (होर्डिंग्ज) लावण्याचे प्रकार वाढले आहेत. या पार्श्वभूमीवर महापालिका आयुक्त नवल किशोर राम यांच्या उपस्थितीत बुधवारी पुणे पोलीस आयुक्तालयात बैठक पार पडली. पोलीस आयुक्त अमितेश कुमार, सहपोलीस आयुक्त रंजनकुमार शर्मा यावेळी उपस्थित होते.
अमितेशकुमार म्हणाले, ‘महापालिका आयुक्तांसह अधिकाऱ्यांच्या उपस्थितीत बैठक पार पाडली. बेकायदा फलकांमुळे शहर विद्रूप दिसते. अशा प्रकाराच्या फलकांमुळे शहराच्या प्रतिमेवर परिणाम होताे. बेकायदा फलक लावणाऱ्यांविरुद्ध कारवाई करण्याचा अधिकार महापालिका आणि पोलिसांकडे आहे. विविध राजकीय पक्षांचे कार्यकर्ते आणि काही व्यावसायिक बेकायदा फलक लावतात. अशा प्रकारचे फलक काढण्यासाठी धोरण ठरविण्याची गरज आहे. बेकायदा फलक लावणाऱ्यांविरुद्ध कडक कारवाई करण्याचा निर्णय घेण्यात आला आहे. आठवडाभरात शहरातील सर्व बेकायदा फलक काढण्यासाठी संयुक्त मोहीम राबविण्यात येणार आहे. फलक तयार करणाऱ्या व्यावसायिकांचीही यादी तयार करण्यात आली आहे.’
‘पावसाळ्याआधी करण्यात येणाऱ्या कामांबाबत या बैठकीत चर्चा करण्यात आली. शहरात पाणी साचणारी ठिकाणे निश्चित करण्यात आली आहेत. पाणी साचणाऱ्या ४०० ठिकाणांची पाहणी करण्यात आली आहे. ज्या भागात पाणी साचते, अशा ठिकाणी पावसाळ्याआधी कामे करण्यात यावीत, याबाबत चर्चा करण्यात आली. पाणी साचणाऱ्या ४०० ठिकाणांची यादी महापालिका प्रशासनाला देण्यात आली आहे,’ असे त्यांनी नमूद केले.
बेवारस, धूळखात पडलेल्या वाहनांवर कारवाई
‘शहरात रस्त्याकडेला वाहने लावण्यात येतात. ती जागेवरून काढलीही जात नाहीत. धूळखात पडलेल्या वाहनांच्या मालकांना ते काढण्याबाबत वेळोवेळी सूचना देण्यात आल्या आहेत. वाहतुकीस अडथळा ठरणारी बेवारस वाहने काढण्याबाबत महापाालिका अधिकाऱ्यांशी बैठकीत चर्चा करण्यात आली. ही बेवारस वाहने महापालिका उचलेल आणि त्याचा खर्च संबंधित वाहनमालकाकडून वसूल केला जाईल, असे पोलीस आयुक्त अमितेश कुमार यांनी स्पष्ट केले.
शहराला शिस्त लावण्याचा प्रयत्न
‘शैक्षणिक संस्थांच्या परिसरात तंबाखुजन्य पदार्थांची विक्री करणाऱ्यांविरुद्ध यापुढील काळात कडक कारवाई करण्यात येणार आहे. गुटखा बंदीवर पोलीस ठाम आहेत. शहर विद्रूप करणे, बेवारस वाहनांवर कारवाई करून शहराला शिस्त लावण्याचा प्रयत्न प्रशासनाकडून करण्यात येणार आहे. नागरिकांनी प्रशासनाला सहकार्य करावे,’ असे पोलीस आयुक्त अमितेश कुमार यांनी नमूद केले.
अतिक्रमणांवर कडक कारवाई
‘शहरात विकासकामे सुरू आहेत. विकासकामे सुरू असताना त्याला शिस्त असणे आवश्यक आहे. अतिक्रमणावर कारवाई करण्यात येत आहे. शहरातील वाहतूक सुरळीत ठेवून वाहतुकीचा वेग वाढण्यासाठी पोलीस आणि महापालिका प्रशासनाकडून प्रयत्न करण्यात आले आहेत. प्रमुख रस्त्यांवर वाहतूकविषयक सुधारणा करण्यात आल्या आहेत. शहराचा लौकिक वाढविणे, तसेच वाहतूकविषयक सुधारणांबाबत मुख्यमंत्री देवेंद्र फडणवीस यांनी सूचना दिल्या आहेत,’ असे महापालिका आयुक्त नवल किशोर राम यांनी सांगितले.
अतिक्रमणांवर कारवाई केल्यानंतर पुन्हा अतिक्रमण होत असेल, तर आता वेगळा विचार करावा लागेल. प्रत्येक प्रभागनिहाय महापालिका अधिकारी आणि पोलीस अधिकाऱ्यांची समिती स्थापन करण्यात येणार आहे. पुणे शहरात प्रत्यक्षात पाच ते सहा लाख पथारी व्यावसायिक आहेत. त्यांपैकी केवळ २२ हजार पथारी व्यावसायिक अधिकृत आहेत. त्यामुळे अतिक्रमणांवर कडक कारवाई करावीच लागेल.
– नवल किशोर राम, महापालिका आयुक्त
