गोल्डन एरा गाण्यांची मैफल; १७ एप्रिलला रसिकांसाठी खास पर्वणी, सुवर्णकाळातील सुरांची मैफल; ‘शलाका’तून जुन्या आठवणींना उजाळा मिळणार
marathinews24.com
पुणे – संगीतप्रेमींसाठी आनंदाची बातमी म्हणजे ‘दिशा इव्हेंट्स’ प्रस्तुत “सुवर्णकाळातील शलाका” हा विशेष संगीत कार्यक्रम येत्या १७ एप्रिल रोजी सायंकाळी ५ वाजता बालशिक्षण, मयूर कॉलनी येथील एम. इ.एस सभागृहात आयोजित करण्यात आला आहे. सुवर्णकाळातील गाजलेल्या अभिनेत्री आणि त्यांच्या चित्रपटांवर आधारित अजरामर गीतांची ही मैफल रसिकांना भूतकाळातील सुरेल आठवणींच्या दुनियेत घेऊन जाणार आहे.
या कार्यक्रमाची संकल्पना व आयोजन सुप्रसिद्ध गायिका शलाका घैसास यांनी केले असून त्या स्वतःही आपल्या आवाजाने या मैफलीत रंग भरतील. कार्यक्रमाचे निवेदन मनीष गोखले करणार आहेत. या सुरेल कार्यक्रमात गायक अजय राव, प्रसाद केळकर आणि अतुल किल्लेदार हे आपापल्या सादरीकरणातून रसिकांना मंत्रमुग्ध करणार आहेत.
तसेच वाद्यसंगतीसाठी अमन सय्यद, ओंकार पाटणकर, हार्दिक रावल, विशाल गंद्रुतवार, संजय खाडे आणि चार्ल्स किंजवाडेकर यांचा सहभाग असणार आहे.
विशेष म्हणजे, हा कार्यक्रम सर्वांसाठी विनामूल्य ठेवण्यात आला असून सुवर्णकाळातील सुरांची ही मेजवानी अनुभवण्यासाठी पुणेकरांनी मोठ्या संख्येने उपस्थित राहावे, असे आवाहन आयोजकांकडून करण्यात आले आहे.
