लग्नानंतर पत्नीला दिला त्रास, ५ जणांवर गुन्हा दाखल
marathinews24.com
पुणे – आयटी कंपनीत ड्रायव्हर असतानाही स्वतःला मॅनेजर असल्याची बतावणी करीत एकाने तरुणीची फसवणूक करत लग्न केले. त्यानंतर तिचा शारीरिक व मानसिक छळ केला. याप्रकरणी आंबेगाव पोलिसांनी ५ जणांविरोधात गुन्हा दाखल केला आहे. ही घटना खराडीतील खांदवेनगर परिसरात २५ मे २०२५ ते एप्रिल २०२६ कालावधीत घडली आहे. याप्रकरणी २६ वर्षीय विवाहित महिलेने आंबेगाव पोलिस ठाण्यात फिर्याद दिली आहे.
पुण्यात गंगाधाम रस्त्यावर रासायनिक कंपनीतून गॅस गळती – सविस्तर बातमी
दीपक दौलतराव मुरकुटे (रा. खांदवेनगर, खराडी), रेखा दौलतराव मुरकुटे (रा. देवकर, ता. लातूर), राहुल दौलतराव मुरकुटे (रा. कर्वेनगर), कल्पना पिंटू मुंढे (रा. अरबुजवाडी, परभणी) आणि अमृता आनंद शेटे (रा. संघर्ष चौक, चंदननगर) अशी गुन्हा दाखल झालेल्यांची नावे आहेत.
पोलिसांनी दिलेल्या माहितीनुसार, दीपक मुरकुटे याने स्वतः आयटी कंपनीत मॅनेजर असल्याचे खोटे सांगून फिर्यादी महिलेशी मे २०२५ मध्ये लग्न केले. प्रत्यक्षात तो ड्रायव्हर म्हणून काम करत असल्याचे उघड झाले. त्यानंतर आरोपींनी महिलेचा शारीरिक व मानसिक छळ करत क्रूर वागणूक दिली. सततच्या त्रासाला कंटाळून विवाहित महिला माहेरी निघून गेली. त्यानंतर तिने पोलिसांत तक्रार दाखल केली. आंबेगाव पोलिसांनी संबंधित पाच जणांविरोधात गुन्हा दाखल केला असून, सहायक पोलिस निरीक्षक भोजलिंग दोडमिसे पुढील तपास करत आहेत.
