सिंहगड रोडवरील सोसायटीतील घटना
marathinews24.com
पुणे – सोसायटीमध्ये खेळत असताना लिफ्टमध्ये अडकल्याने गुदमरून ७ वर्षीय मुलाचा मृत्यू झाला आहे. ही घटना सोमवारी ( दि. १८) रात्री साडेदहा वाजण्याच्या सुमारास सिंहगड रोड परिसरातील निम्बजनगरमधील रिद्धी सिद्धी इमारतीत घडली आहे. शिवांश शैलेश धूत (वय ७) असे ठार झालेल्या मुलाचे नाव आहे.
मुंढव्यातील तो खून नव्हे अपघात – सविस्तर बातमी
पोलिसांनी दिलेल्या माहितीनुसार, शिवांश हा सोसायटीच्या आवारात खेळत असताना लिफ्टमध्ये गेला होता. त्याने लिफ्टमधील बटणे दाबल्यानंतर लिफ्ट सुरू झाली. मात्र दुसरा मजला येण्यापूर्वीच लिफ्ट अचानक अडकली. बराच वेळ झाल्यानंतर सोसायटीतील रहिवाशांच्या ही बाब लक्षात आली. त्यांनी अग्निशमन दलासह सिंहगड पोलिसांना माहिती दिली. त्यानंतर अग्निशमन दलाचे जवान घटनास्थळी दाखल झाले. त्यांनी मुलाला बाहेर काढले. त्याला रुग्णालयात दाखल करण्यात आले होते. मात्र मुलाचा गुदमरून मृत्यू झाल्याचे डॉक्टरांनी सांगितले.
लिफ्टची देखभाल सोसायटीमार्फत केली जात असल्याची माहिती समोर आली आहे. या प्रकरणी सिंहगड रोड पोलिसांनी अकस्मात मृत्यूची नोंद केली आहे. वरिष्ठ पोलीस निरीक्षक विनय पाटणकर तपास करत आहेत.
