चोरट्यांविरुद्ध गुन्हा दाखल
marathinews24.com
पुणे – गजबजलेल्या गणेश पेठेत चोरट्यांंनी एका इमारतीतील घरातून एक लाख ६८ हजार रुपयांचे दागिने चोरुन नेल्याची घटना घडली.
याबाबत एकाने फरासखाना पोलीस ठाण्यात फिर्याद दिली आहे. त्यांनी दिलेल्या फिर्यादीनुसार चोरट्यांविरुद्ध गुन्हा दाखल करण्यात आला आहे.
निलेश घायवळ टोळीतील गुंड अटकेत – सविस्तर बातमी
पोलिसांनी दिलेल्या माहितीनुसार, तक्रारदार हे कुटुंबीयांसह गणेश पेठेतील शाहीर बिल्डींगमध्ये राहायला आहेत. गुरुवारी (२५ जून) चोरटे खिडकीतून तक्रारदाराच्या घरात शिरले. चोरट्यांनी कपाटातून एक लाख ६८ हजार रुपयांचे सोन्याचे दागिने लांबविले. सायंकाळी पावणेपाचच्या सुमारास कपाटातील दागिने चोरीला गेल्याचा प्रकार उघडकीस आला. सहायक पोलीस निरीक्षक लाला लोणकर तपास करत आहेत. शहर परिसरात गेल्या काही दिवसांपासून घरफोडीच्या घटनांमध्ये वाढ झाली आहे. हडपसर, सिंहगड रस्ता भागात भरदिवसा सदनिकेचे कुलूप तोडून चोरट्यांनी दागिने लांबविल्याची घटना नुकतीच घडली.
मोटारीच्या धडकेत एकाचा मृत्यू
मोटारीच्या चाकाखाली सापडून एकाचा मृत्यू झाल्याची घटना कात्रज भागातील शेलार मळा परिसरात घडली. याप्रकरणी मोटार चालकाविरुद्ध भारती विद्यापीठ पोलिसांनी गुन्हा दाखल केला. विलास मारुती धांडे (वय ४३, रा. शिवशंभोनगर, कात्रज-कोंढवा रस्ता) असे मृत्यूमुखी पडलेल्याचे नाव आहे. याबाबत त्यांचा मुलगा अरुण (वय २१) याने भारती विद्यापीठ पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, २३ जून रोजी विलास धांडे हे दुपारी एकच्या सुमारास शेलार मळा परिसरातील एका झाडाखाली झाेपले होते. त्यावेळी मोटारीच्या चाकाखाली सापडून ते गंभीर जखमी झाले. अपघातानंतर जखमीला वैद्यकीय मदत न करता मोटार चालक पसार झाला. गंभीर जखमी झालेल्या धांडे यांना उपचारासाठी रुग्णालयात दाखल केले. उपचारांपूर्वीच त्यांचा मृत्यू झाला होता. सहायक पोलीस निरीक्षक गणेश मोहिते तपास करत आहेत.
