पुण्यातील सुखसागरनगरातील घटना, चालक ताब्यात
marathinews24.com
पुणे – शहरातील विविध भागात अपघांताची मालिका कायम असून, बेदरकारपणे वाहने चालवित सर्वसामान्यांचा जीव घेतला जात आहे. मार्केटयार्डातील गंगाधाम चौकामध्ये ट्रकचालकाने महिलेला चिरडल्याची घटना ताजी असतानाच, भरधाव मोटार चालकाने पादचारी तरूणीला उडविल्याची घटना शुक्रवारी (दि. १३) दुपारी सव्वा दोनच्या सुमारास कात्रजमधील सुखसागरनगर परिसरामध्ये यशश्री सोसायटीसमोर घडली आहे. अपघातानंतर संतप्त नागरिकांनी कोंढवा पोलीस ठाणे गाठत वाहन चालकावर कठोर कारवाई करण्याची मागणी केली आहे.
फ्लॅटचा दरवाजा उघडा असल्याची संधी साधली, सव्वा लाखांची चोरी – सविस्तर बातमी
श्रेया गौतम येवले (वय २१, शीतल हाईट्स, खंडोबा मंदिर जवळ कोंढवा पुणे)असे ठार झालेल्या मुलीचे नाव आहे. याप्रकरणी सतीश गुरुनाथ होनमाने (वय ३७ रा गोकुळ नगर) याला पोलिसांनी ताब्यात घेतले आहे.
पोलिसांनी दिलेल्या माहितीनुसार, कात्रज परिसरातील सुखसागरनगरमध्ये शुक्रवारी दुपारी दोनच्या सुमारास टुरिस्ट मोटार चालकाने वाहनावरील (एम एच १२ यु एम ४८४७) नियंत्रण सुटले. त्यामुळे मोटार चालकाने मुख्य रस्त्यावरून पदपथानजीक नारळाचे झाड तोडून पायी चालत निघालेल्या श्रेया येवले हिला जबर धडक दिली.
मोटार आणि नारळाच्या झाडात अडकल्यामुळे श्रेयाचा जागीच मृत्यू झाला. घटनेची माहिती मिळताच भारती विद्यापीठ, बिबवेवाडी, कोंढवा पोलीस ठाण्यातील वरिष्ठ पोलीस अधिकारी व कर्मचारी अपघातस्थळी दाखल झाले. मोटार चालक सतीश होनमाने याला ताब्यात घेतले. अपघाताच्या घटनेनंतर परिसरातील नागरिकांनी गर्दी केली होती. संबंधित चालकावर कडक कारवाई करण्याची मागणी स्थानिकांनी केली.
