मार्केटयार्ड परिसरातील घटना
marathinews24.com
पुणे – नोकरीच्या मोहात अडकलेल्या तरूणाने तब्बल ११ लाख रूपये गमावल्याची घटना मार्केटयार्ड परिसरात घडली आहे. याप्रकरणी गंगाधाम चौकात राहणार्या तरूणाने दिलेल्या फिर्यादीनुसार सायबर चोरट्यांविरूद्ध गुन्हा दाखल करण्यात आला आहे. ही घटना ८ मे ते ३० जून कालावधीत मार्केटयार्डमध्ये घडली आहे.
शेअर मार्केटमधील गुंतवणूक पडली ३२ लाखांना – सविस्तर बातमी
पोलिसांनी दिलेल्या माहितीनुसार, तक्रारदार तरूण मार्केटयार्ड परिसरातील गंगाधाम चौकातील इमारतीत राहायला आहे. ८ मे रोजी साबयर चोरट्यांनी त्याला फोन करून लिकर कंपनीमध्ये एचआर मॅनेजर असल्याची बतावणी केली. तक्रारदाराला जॉब देण्याचे आमिष दाखवून सायबर चोरट्याने विश्वास संपादित केला. त्यानंतर त्याने तरूणाला स्वतःच्या बँकखात्यात पैसे वर्ग करण्यास भाग पाडले. तब्बल ११ लाख रूपये वर्ग करूनही तरूणाला नोकरी मिळाली नाही. फसवणूक झाल्याचे लक्षात आल्यानंतर त्याने मार्केटयार्ड पोलीस ठाणे गाठून फिर्याद दाखल केली. पोलीस निरीक्षक सुनिता नवले तपास करीत आहेत.
जादा परताव्याच्या आमिषाने तरूणीची फसवणूक
टास्क पुर्ण करण्याच्या नावाखाली सायबर चोरट्याने एका २३ वर्षीय तरूणीचा विश्वास संपादित केला. त्यानंतर तिला जास्तीचा परतावा देण्याचे आमिष दाखवून ऑनलाईनरित्या तब्बल ६ लाख ४२ हजारांची फसवणूक केली आहे. ही घटना १२ ते १४ जुलैला खराडी परिसरात घडली आहे. याप्रकरणी तरूणीने खराडी पोलीस ठाण्यात फिर्याद दाखल केली आहे. त्यानुसार मोबाइलधारक आरोपीविरूद्ध गुन्हा दाखल केला आहे. पोलीस निरीक्षक विश्वजित जगताप तपास करीत आहेत.
