सहायक निरीक्षकाला निलंबित करण्याचा पोलीस आयुक्तांचा आदेश
marathinews24.com
पुणे – पोलिसांच्या नियंत्रण कक्षात नेमून दिलेल्या कामाच्या वेळेत गैरहजर राहणाऱ्या सहायक पोलीस निरीक्षकाला निलंबित करण्याचा आदेश पोलीस आयुक्त अमितेशकुमार यांनी दिला. अभिजित प्रभाकर जाधव असे निलंबित करण्यात आलेल्या सहायक निरीक्षकाचे नाव आहे. सहायक निरीक्षक जाधव यांची ३१ मार्च २०२६ रोजी पोलीस नियंत्रण कक्षात दुपारी चार ते रात्री बारा या वेळेत ‘सीआरओ’ (कंट्रोल रूम ऑफिसर) म्हणून नियुक्ती करण्यात आली होती.
तब्बल ६० लाखांचा गुटखा जप्त – सविस्तर बातमी
पोलीस नियंत्रण कक्षातील वरिष्ठांना कोणतीही पूर्वसूचना न देता जाधव गैरहजर राहिले. त्यामुळे पोलीस नियंत्रण कक्षाकडून शहरातील महत्त्वाच्या घटनांचा अहवाल वरिष्ठ अधिकाऱ्यांना सादर करण्यास उशीर झाला. पोलीस नियंत्रण कक्षातील अधिकारी ही महत्त्वाची जबाबदारी आहे. संपूर्ण शहरातील घडामोडींवर पोलीस नियंत्रण कक्षातील अधिकारी लक्ष ठेवून असतात. यापूर्वीही पूर्वसूचना न देता सहायक निरीक्षक जाधव हे गैरहजर राहिले होते. त्यांना वेळोवेळी वरिष्ठ अधिकाऱ्यांनी समजही दिली होती. मात्र, त्यांच्या वर्तणुकीत बदल झाला नव्हता. वरिष्ठ अधिकाऱ्यांनी जाधव यांची चौकशी केली. त्यांचे वर्तन हे बेजबाबदार आणि निष्काळजीपणाचे असल्याचा ठपका ठेवण्यात आला. त्यानंतर सहायक निरीक्षक जाधव यांना निलंबित करण्याचा आदेश पोलीस आयुक्त अमितेश कुमार यांनी दिला.
