हप्ते थकबाकीच्या वादातून मारहाण व अपहरणाचा प्रयत्न केल्याचा आरोप
marathinews24.com
पुणे – शहरातील बाणेर पोलीस ठाण्याच्या हद्दीत पाषाण-सुस रोडवरील दुर्गा कॅफेजवळ एका २१ वर्षीय तरुणावर फायनान्स कंपनीच्या कथित रिकव्हरी एजंटसह तिघांनी हल्ला केल्याची गंभीर घटना समोर आली आहे. हप्ते थकबाकीच्या वादातून मारहाण व अपहरणाचा प्रयत्न केल्याचा आरोप करण्यात आला आहे.
पुण्यात सहायक फौजदारासह हवालदार निलंबित – सविस्तर बातमी
तक्रारदार गिरीष निलेश मोची (रा. म्हाळुंगे, पुणे) हा क्रेन ऑपरेटर असून, त्याच्या वडिलांच्या नावावर असलेली स्प्लेंडर दुचाकी तो वापरत होता. संबंधित वाहनावर फायनान्स कंपनीचे कर्ज असून काही हप्ते थकीत असल्याचे सांगितले जाते.
तक्रारीनुसार, १९ एप्रिल रोजी दुपारी सुमारे ‘दिपक’ नावाच्या व्यक्तीने थकबाकीच्या कारणावरून दुचाकी ताब्यात घेतल्याचे फोनवरुन सांगितले. संध्याकाळी हप्ते भरण्यास तयार असल्याचे कळविल्यानंतर तक्रारदाराला पाषाण येथील दुर्गा कॅफेजवळ बोलावण्यात आले. तक्रारदार आपल्या भावासह तेथे पोहोचला असता, आरोपी दिपक व त्याचे दोन साथीदार यांनी दुचाकी परत न देता उलट शिवीगाळ करत कमरेच्या पट्ट्याने व लोखंडी पाईपने मारहाण केली. या हल्ल्यात तक्रारदाराच्या पाठीवर, हातावर व डोक्यावर दुखापत झाली. तसेच साथीदारांनी प्लास्टिक खुर्च्यांनी व लाथाबुक्क्यांनी मारहाण केली. यावेळी तक्रारदाराचा लहान भाऊ भीतीपोटी तेथून पळून गेला. आरोपींनी तक्रारदाराला जबरदस्तीने दुचाकीवर बसवून अपहरण करण्याचा प्रयत्न केल्याचा आरोपही करण्यात आला आहे. मात्र तक्रारदाराने स्वतःची सुटका करून घेत बाणेर पोलीस ठाण्यात धाव घेतली. पोलिसांनी त्याला औंध येथील रुग्णालयात उपचारासाठी पाठवले.
