खेड शिवापूर टोलजवळ भीषण अपघात
marathinews24.com
पुणे – गॅसची वाहतूक करणाऱ्या टँकर चालकाने दिलेल्या धडकेत दुचाकीस्वार दाम्पत्याचा जागीच मृत्यू झाला आहे. हा अपघात शुक्रवारी (दि. ८) दुपारी खेड शिवापूर टोल नाक्याजवळ झाला आहे. अपघातानंतर संतप्त नागरिकांनी टँकरची तोडफोड केली असून, परिसरात काही काळ तणावाचे वातावरण निर्माण झाले होते. अपघातात ठार झालेले दाम्पत्य वारजे माळवाडी परिसरात राहायला होते.
सायबर चोरट्यांकडून तिघांची ३७ लाखांची फसवणूक – सविस्तर बातमी
राजेंद्र बबन मोरे (वय ५५) आणि सविता राजेंद्र मोरे (वय ४२, दोघे रा. वारजे माळवाडी) अशी ठार झालेल्या दाम्पत्याचे नाव आहे. टँकर चालक राज किशन बी. (वय ३९ , रा. तिरुपुरम) याला पोलिसांनी ताब्यात घेतले आहे.
पोलिसांनी दिलेल्या माहितीनुसार, दुचाकीस्वार मोरे दाम्पत्य हे शुक्रवारी दुपारी सातार्याकडे चालले होते. खेड शिवापूर टोल नाक्याच्या पाठीमागील लेनवर भरधाव गॅस टँकर चालकाने त्यांच्या दुचाकीला जोरदार धडक दिली. धडक इतकी भीषण होती की दोघेही टँकरखाली ओढले गेले. आवाजामुळे परिसरातील नागरिकांनी मदतीसाठी धाव घेतली. मात्र, मोरे दाम्पत्य चाकाखाली अडकल्यामुळे त्यांना बाहेर काढता आले नाही. त्यामुळे त्यांचा जागीच मृत्यू झाला. दरम्यान, टँकर चालकाचे नियंत्रण सुटल्याने अपघात घडल्याचा प्राथमिक अंदाज व्यक्त करण्यात येत आहे. धडकेनंतर दुचाकी रस्त्याच्या बाजूला फेकली गेली होती.
अपघातानंतर स्थानिक नागरिकांनी तातडीने मदतीसाठी धाव घेत पोलिसांना माहिती दिली. मात्र, गंभीर दुखापतींमुळे दाम्पत्याचा जागीच मृत्यू झाला होता. दरम्यान, अपघाताच्या पार्श्वभूमीवर संतप्त नागरिकांनी गॅस टँकरची तोडफोड केली. त्यामुळे परिसरात काही काळ तणावाचे वातावरण निर्माण झाले होते. घटनास्थळी पोलिसांनी धाव घेत परिस्थिती नियंत्रणात आणली. तसेच दोन्ही मृतदेह शवविच्छेदनासाठी रुग्णालयात दाखल करण्यात आले आहेत.
चाकाखाली ५० फुट फरफटत नेले
भरधाव टँकर चालकाने पाठीमागून दुचाकीस्वार मोरे दाम्पत्याला धडक दिली. त्यामुळे दोघेही चाकाखाली सापडून सुमारे ५० ते ६० फुट फरफटत गेल्याचे दिसून आले आहे. दोघांच्या अंगावरून टँकर गेल्यामुळे रस्त्यावर दूरवर रक्तमांसाचा सडा पडल्याचे दिसून आले. त्यामुळे परिसरातून जाणार्या नागरिकांसह वाहन चालकांमध्ये भीतीचे वातावरण निर्माण झाले होते.
