होणाऱ्या पतीला छायाचित्रे पाठविली
marathinews24.com
पुणे – प्रेमसंबंध तोडल्याने तरुणी, तसेच तिच्या कुटुंबीयांना जिवे मारण्याची धमकी देऊन होणाऱ्या पतीला छायाचित्रे पाठवून विवाह मोडल्याचा प्रकार उघडकीस आला. याप्रकरणी येरवड्यातील लक्ष्मीनगर पोलिसांनी तरुणाला अटक केली. इम्रान रहमान शेख (वय २२, रा. लक्ष्मीनगर, येरवडा) असे अटक केलेल्याचे नाव आहे. याबाबत २१ वर्षाच्या तरुणीने लक्ष्मीनगर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी तरुणीचे आरोपी इम्रान शेख याच्यााशी चार वर्ष प्रेमसंबध होते. तरुणीच्या कुटुंबीयांनी तिचा विवाह ठरविला. त्यामुले तरुणीने त्याला प्रेमसंबंध ठेवू नको, माझा विवाह ठरला आहे, असे शेखला सांगितले. त्यानंतर शेखने तरुणीला शिवीगाळ करुन धमकावले. ‘तुझा विवाह जमू देणार नाही. तुझ्या कुटुंबीयाचा खून करेल’, अशी धमकी दिली.
आरोपीने तरुणीच्या आईला तीक्ष्ण शस्त्राचा धाक दाखवून तिला जिवे मारण्याची धमकी दिली होती. त्यानंतर आरोपी शेखने तरुणीचा ज्याच्याशी विवाह ठरला होता. त्याला प्रेमसंबंधाची छायाचित्रे पाठविली. नियोजित पतीने विवाह मोडला. घटनेनंतर तरुणीने पोलिसांकडे तक्रार दिली. पोलीस उपनिरीक्षक जगताप तपास करत आहेत.
