दोन घटनांमध्ये सव्वा पाच लाखांचा ऐवज लांबविला
marathinews24.com
पुणे – पीएमपी तसेच खासगी व शासकीय बसमध्ये चोऱ्या करणाऱ्या चोरट्यांनी उच्छाद घातला असून, दोन घटनांमध्ये तब्बल सव्वा पाच लाखांचा ऐवज चोरून नेला आहे. छत्रपती शिवाजी महाराज पुलावरील प्रवास करणाऱ्या महिलेच्या गळ्यातील तब्बल २ लाख ९५ हजार रुपयांचे दागिने चोरून नेले. तर, दुसऱ्या घटनेत प्रवासादरम्यान महिलेच्या पिशवीतून २ लाख ३५ हजारांचा ऐवज चोरला आहे.
येवलेवाडी अन मुंढव्यात ४६ लाखांची घरफोडी – सविस्तर बातमी
पहिल्या घटनेत ५३ वर्षीय महिलेने शिवाजीनगर पोलिस ठाण्यात तक्रार दिली आहे. त्यानूसार, अज्ञाताविरूद्ध गुन्हा नोंद करण्यात आला आहे. तक्रारदार या कुंभारवाडी येथील आहेत. त्या मनपा येथून पीएमपी बसने प्रवास करत होत्या. बसमध्ये गर्दी होती. यादरम्यान, चोरट्यांनी गर्दीतून त्यांच्या गळ्यातील २ लाख ९५ हजारांचे मंगळसूत्र चोरून नेले. काही वेळातच हा प्रकार तक्रारदारांच्या लक्षात आला. पण, चोरट्याने पोबारा केला होता.
दुसऱ्या घटनेत सिंहगड रोड पोलिस ठाण्यात ७३ वर्षीय ज्येष्ठाने तक्रार दिली आहे. माहितीनुसार, तक्रारदार ज्येष्ठ हे सिंहगड रोडवरील हिंगणे भागात राहतात. ते नाशिक येथे गेल्या होत्या. ५ फेब्रुवारी रोजी ते नाशिक येथील ठक्कर बाजार बसस्थानकातून पुण्याकडे निघाले. त्यांनी पिशवीत २ लाख ३५ हजार रुपयांचे दागिने ठेवले होते. वाकडेवाडी एसटी स्थानकात उतरल्यानंतर तेथून ते घरी आले. त्यांनी पिशवीची पाहणी केली असता त्यांना पिशवीतून दागिने चोरीला गेल्याचे दिसून आले. पोलीस उपनिरीक्षक संतोष भांडवलकर तपास करत आहेत.
