बनावट रेकॉर्ड तयार करुन इंटरनेट बँकिंगद्वारे पत्नीच्या नावावर ट्रान्सफर केले पैसे
marathinews24.com
पुणे – विद्या प्रतिष्ठान नामवंत संस्थेतील नांदेड सिटी पब्लिक स्कुलमध्ये काम करणाऱ्या क्लार्कने इंटरनेट बँकिंगद्वारे संस्थेतील ३६ लाख ९९ हजार ९८८ रुपये पत्नीच्या नावावर ट्रान्सफर करुन पवार पब्लिक स्कुलला गंडा घातला आहे. याबाबत प्राचार्या वंदना सचिन जोशी (वय ५५, रा. चंद्रागण सोसायटी, आंबेगाव बुद्रुक) यांनी नांदेड सिटी पोलिस ठाण्यात फिर्याद दिली आहे. त्यावरून राजेंद्र अनपट आणि अश्विनी अनपट ऊर्फ अश्विनी तरटे (रा. युतिका एन्क्लेव्ह, कोल्हेवाडी) यांच्यावर गुन्हा दाखल केला आहे. हा प्रकार नांदेड सिटी येथील पवार पब्लिक स्कुल येथे ५ नोव्हेंबर २०२४ ते ३ जून २०२५ दरम्यान घडला आहे. ज्येष्ठ नेते शरद पवार हे विद्या प्रतिष्ठान या संस्थेच्या संस्थापक अध्यक्षपदी असून खजिनदार युगेंद्र श्रीनिवास पवार आहेत. खासदार सुप्रिया सदानंद सुळे या मॅनेजिंग ट्रस्टी आहेत.
लाच घेताना विविध कार्यकारी सहकारी सोसायटीचा सचिव जाळ्यात – सविस्तर बातमी
पोलिसांनी दिलेल्या माहितीनुसार, विद्या प्रतिष्ठान संस्थेत राजेंद्र अनपट हा क्लार्क म्हणून कामाला आहे. त्याने संस्थेच्या संमतीशिवाय इंटरनेट बँकिंगद्वारे परस्पर रक्कम पत्नी अश्विनीच्या नावे ट्रान्सफर केली. संस्थेच्या अभिलेखात खोटे रेकॉर्ड तयार करुन संस्थेचा विश्वासघात केला. ३६ लाख ९९ हजार ९८८ रुपयांची आर्थिक फसवणूक केली. संस्थेच्या लेखा परिक्षणात ही बाब समोर आली. त्यानंतर पोलिसांकडे फिर्याद देण्यात आली आहे. नांदेड सिटी पोलिसांनी फसवणुकीचा गुन्हा दाखल केला. राजेंद्र अनपट याला चौकशीसाठी बोलवले आहे, त्यानंतर पुढील कारवाई करण्यात येईल, असे वरिष्ठ पोलिस निरीक्षक अतुल भोसे यांनी सांगितले.
