चोरट्याविरुद्ध गुन्हा दाखल
marathinews24.com
पुणे – पादचारी ज्येष्ठ महिलेच्या गळ्यातील १ लाख ८० हजार रुपयांचे मंगळसूत्र दुचाकीस्वार चोरट्याने हिसकावून नेल्याची घटना नुकतीच घडली. याबाबत एका ज्येष्ठ महिलेने विश्रामबाग पोलीस ठाण्यात फिर्याद दिली आहे. त्यांनी दिलेल्या फिर्यादीनुसार चोरट्याविरुद्ध गुन्हा दाखल करण्यात आला आहे.
धनकवडीतील उड्डाणपुलाजवळ एकाचा खून – सविस्तर बातमी
पोलिसांनी दिलेल्या माहितीनुसार, तक्रारदार ७० वर्षीय महिला सिंहगड रस्ता भागात राहायला आहेत. त्या १० जुलै रोजी सायंकाळी साडेसातच्या सुमारास लोकमान्यनगर परिसरातून निघाल्या होत्या. त्या वेळी त्यांच्या मागावर असलेल्या एका चोरट्याने गळ्यातील मंगळसूत्र हिसकावून नेले. महिलेने आरडाओरडा केला. चोरटा पसार झाला. या घटनेची माहिती मिळताच पोलिसांनी घटनास्थळी धाव घेतली. पोलिसांनी लोकमान्यनगर परिसरातील सीसीटीव्ही चित्रीकरण तपासले असून, पसार झालेल्या चोरट्यांचा शोध घेण्यात येत आहे. सहायक पोलीस निरीक्षक कारके तपास करत आहेत.
भरदिवसा फ्लॅटमधून ऐवज चोरी
पुणे- फ्लॅटचा दरवाजा उघडा असल्याची संधी साधून चोरट्यांनी कपाटातील एक लाख ३९ हजार रुपयांचा ऐवज लांबविल्याची घटना सिंहगड रस्त्यावरील नऱ्हे भागात घडली. याप्रकरणी चोरट्यांविरुद्ध गुन्हा दाखल करण्यात आला आहे. याबाबत एका महिलेने नऱ्हे पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, तक्रारदार ५० वर्षीय महिला नऱ्हे भागातील श्री समर्थ सोसायटीत राहायला आहेत. ९ जुलै रोजी सकाळी त्यांच्या सदनिकेचा दरवाजा उघडा होता. महिलेेचे लक्ष नसल्याची संधी साधून चोरट्यांनी कपाटातून एक लाख ३९ हजार रुपयांचे सोन्याचे दागिने चोरून नेले. कपाटातून ऐवज चोरीला गेल्याचे लक्षात आल्यानंतर महिलेने नुकतीच पोलिसांकडे तक्रार दिली. पोलीस कर्मचारी खटावकर तपास करत आहेत.
शहर परिसरात गेल्या काही दिवसांपासून भरदिवसा सदनिकेचे कुलूप तोडून ऐवज चोरून नेण्याच्या घटना वाढल्या आहेत. हडपसर, बिबवेवाडी भागातील सोसायटीतील सदनिकेतून ऐवज चोरून नेण्याची घटना नुकतीच घडली.
