रुग्ण तपासणीच्या बहाण्याने डॉक्टरला लुटले
marathinews24.com
पुणे – रुग्ण तपासणी करण्याची बतावणी करुन डाॅक्टरला चाकूच्या धाकाने लुटण्यात आल्याची घटना पुणे-सातारा रस्त्यावरील एका सोसायटीच्या आवारात घडली. याप्रकरणी पसार झालेल्या चाेरट्यांविरुद्ध सहकारनगर पोलिसांनी गुन्हा दाखल केला आहे.
याबाबत ४९ वर्षीय डाॅक्टरांनी फिर्याद दिली आहे. त्यांनी दिलेल्या फिर्यादीनुसार, दोन चोरट्यांविरुद्ध गुन्हा दाखल करण्यात आला आहे.
नववर्षाच्या पहिल्या दिवशी मध्यभागात वाहतूक कोंडी – सविस्तर बातमी
पोलिसांनी दिलेल्या माहितीनुसार, तक्रारदार डाॅक्टरांचा खासगी दवाखाना आहे. ते कात्रज भागात राहायला आहेत. बुधवारी (३१ डिसेंबर) रात्री नऊच्या सुमारास चोरटे त्यांच्या दवाखान्यात गेले. ‘एक रुग्ण अत्यवस्थ आहे. त्याची तपासणी करायची आहे’, अशी बतावणी चोरट्यांनी त्यांच्याकडे केली. त्यानंतर चोरटे त्यांना घेऊन पुणे-सातारा रस्त्यावरील अथर्व परिहाज इमारतीच्या तळमजल्यावर घेऊन गेले. त्यानंतर चोरट्यांनी त्यांना चाकूचा धाक दाखविला. चोरट्याने त्यांच्या बोटावर चाकूने वार केला. चोरट्याबरोबर असलेल्या साथीदाराने डाॅक्टरांकडील दुचाकीचा ताबा घेतला. डाॅक्टरांच्या पिशवीत ३० हजारांची रोकड, मोबाइल , एक लाख रुपयांचा चांदीचा जग असा मुद्देमाल होता. दुचाकी, मोबाइल, रोकड, चांदीचा जग असा मुद्देमाल घेऊन चोरटे पसार झाले.
घटनेनंतर घाबरलेल्या डाॅक्टरांनी सहकारनगर पोलीस ठाण्यात फिर्याद दिली. वरिष्ठ पोलीस निरीक्षक विठ्ठल पवार, सहायक निरीक्षक जाधव यांनी घटनास्थळी भेट दिली. पोलिसांनी सोसायटीच्या आवारातील सीसीटीव्ही चित्रीकरण तपासले आहे. डाॅक्टरांनी दिलेल्या वर्णनानुसार चोरट्यांचा माग काढण्यात येत असून, पोलीस उपनिरीक्षक सद्दाम फकीर तपास करत आहेत.
