पुण्यातील वारजे माळवाडीतील घटनेने नागरिकांमध्ये भीतीचे वातावरण
marathinews24.com
पुणे – ड्रग्स प्रकरणातील फरार आरोपीकडून दोघांवर अंदाधुंद गोळीबार केल्याची धक्कादायक घटना शुक्रवारी संध्याकाळी पावणे सातच्या सुमारास वारजेतील हेअर अॅडिक्ट केशकर्तनालयात झाली. दुकानात बसलेल्या दोघांवर आरोपीने गोळीबार तसेच कोयत्याने हल्ला करून त्यांना गंभीर जखमी केले. ऐन गर्दीच्यावेळी गोळीबार घडल्याने नागरिकांमध्ये मोठी भीती निर्माण झाली.
पुण्यातील व्हॅलेंटिना इंडस्ट्रीजचे दोघे संचालक फरार – सविस्तर बातमी
गोळीबारात निहाल शिंदे आणि अमोल आढाव हे जखमी झाले आहेत. त्यांच्यावर जवळच्या रुग्णालयात उपचार सुरू आहेत. साहिल राऊत या आरोपीला डीबी पथकाने गस्तीदरम्यान पकडले आहे. उत्तमनगर पोलिस ठाण्यात यापूर्वी १७ वर्षीय मुलीच्या अपहरणप्रकरणी गुन्हा दाखल आहे. याप्रकरणात राठ्या राठोड आरोपीला अटक केली होती. तपासादरम्यान त्याने अनेक अल्पवयीन मुलांना ड्रग्ज विक्रीसह तीन जणांकडून ड्रग्ज खरेदी केल्याचे निष्पन्न झाले होते. त्यानुसार राजन गोपाल नायर (वय ३७), जतीन जयवंत कदम (वय २६, रा. वारजे) आणि शुभम संतोष दहिभाते (वय २८, रा. कोंढवे धावडे) यांना अटक केली होती.
यातील काही आरोपी अद्याप फरार असून, त्यापैकीच फरार आरोपीने शुक्रवारी रात्री वारजे परिसरात येऊन हा गोळीबार केल्याची प्राथमिक माहिती पोलिसांनी दिली आहे. पोलिसांनी एका संशयिताला ताब्यात घेतले आहे. या घटनेनंतर घटनास्थळी वारजे पोलीस दाखल झाले आहेत. घटनास्थळावरील सीसीटीव्ही फुटेज तपासले जात असून आरोपीच्या हालचालींचा माग काढण्याचे काम सुरू आहे. घटनेमुळे परिसरात काही काळ तणावाचे वातावरण निर्माण झाले होते. पुढील तपास वारजे माळवाडी पोलीस करत आहेत.
