पाषाण परिसरातील घटना
marathinews24.com
पुणे – फ्लॅटचे कुलूप तोडून चोरट्यांनी साडेपाच लाख रुपयांचा ऐवज लांबविल्याची घटना पाषाणमधील सुतारवाडी परिसरात घडली. याप्रकरणी बाणेर पोलिसांनी चोरट्याविरुद्ध गुन्हा दाखल करण्यात आला आहे. याप्रकरणी एकाने बाणेर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार सुतारवाडी परिसरातील मुक्ता रेसीडन्सी सोसायटीत राहायला आहेत. ७ जून रोजी तक्रारदार आणि कुटुंबीय बाहेर गेले होते. चोरट्यांनी सदनिकेचे कुलूप तोडले. शयनगृहातील कपाट उचकटून चोरट्यांनी पाच लाख ४३ हजार ५०० रुपयांचे सोन्याचे दागिने लांबविले.
पुण्यात सुवर्ण भिशी योजनेत ४२ लाखांची फसवणूक – सविस्तर बातमी
तक्रारदार सोमवारी बाहेरगावाहून परतले असता, तेव्हा घरफोडीचा प्रकार उघडकीस आला. त्यानंतर त्यांनी पोलिसांकडे तक्रार दिली. सहायक पोलीस निरीक्षक महेश थिटे तपास करत आहेत. दरम्यान, उन्हाळी सुटीत अनेकजण सहकुटुंब बाहेरगावी जातात. चोरटे सोसायटीतील बंद सदनिकांची पाहणी करुन घरर्‍फोडी करत असल्याचे दिसून आले आहे. आठवडभरात घरफोडीचे सहा ते सात गुन्हे वेगवेगळ्या पोलीस ठाण्यात दाखल झाले आहेत. त्यामुळे बाहेरगावी जाण्याआधी आपल्या घराची सुरक्षितता महत्वाची असून, त्यादृष्टीने उपाययोजना करण्याचे आवाहन पोलिसांनी केले आहे.
