विमाननगर भागातील संस्थेतील दोघांविरुद्ध गुन्हा
marathinews24.com
पुणे – वैद्यकीय अभ्यासक्रमास प्रवेश मिळवून देण्याच्या आमिषाने एकाची ५ लाख रुपयांची फसवणूक करण्यात आल्याचा प्रकार उघडकीस आला आहे. याप्रकरणी विमाननगर भागातील एका संस्थेतील समुपदेशकासह दोघांविरुद्ध गुन्हा दाखल करण्यात आला आहे. याबाबत एकाने विमानतळ पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, एका खासगी संस्थेतील समुपदेशकासह दोघांविरुद्ध गुन्हा दाखल करण्यात आला आहे.
कारवाईची भीती दाखवून ज्येष्ठाची फसवणूक – सविस्तर बातमी
पोलिसांनी दिलेल्या माहितीनुसार, तक्रारदार हे मूळचे अकोला जिल्ह्यातील मूर्तिजापूरचे रहिवासी आहेत. त्यांच्या दोन्ही मुलींना वैद्यकीय अभ्यासक्रमास (एमबीबीएस) प्रवेश हवा होता. याबाबत त्यांनी चौकशी केली. विमाननगर भागातील एका संस्थेत ते गेल्या वर्षी डिसेंबर महिन्यात आले होते. संबंधित संस्थेतील समुपदेशकाने दोन्ही मुलींना वैद्यकीय अभ्यासक्रमास प्रवेश मिळवून देतो, असे सांगितले. त्यानंतर तक्रारदाराने त्यांच्या दोन्ही मुलींच्या बँक खात्यातून संबंधित संस्थेच्या बँक खात्यात पाच लाख रुपये जमा केले.
पैसे जमा केल्यानंतर त्यांना वैद्यकीय अभ्यासक्रमास प्रवेश मिळवून देण्यात आला नाही, तसेच पैसे परत करण्यात टाळाटाळ करण्यात आली. फसवणूक झाल्याचे लक्षात आल्यानंतर त्यांनी नुकतीच पोलिसांकडे तक्रार दिली. पोलीस उपनिरीक्षक गुंड तपास करत आहेत.
