दुर्घटनेस जबाबदार ठरल्याप्रकरणी तिघांविरुद्ध गुन्हा
marathinews24.com
पुणे – नियोजित गृहप्रकल्पात तिसऱ्या मजल्यावर काम करणारा बांधकाम मजूर तोल जाऊन पडल्याने मृत्यू झाल्याची घटना वडगाव शेरी भागात घडली. सुरक्षाविषयक काळजी न घेणे, तसेच दुर्घटनेस जबाबदार ठरल्याप्रकरणी चंदननगर पोलिसांनी तिघांविरुद्ध गुन्हा दाखल केला.
बिबवेवाडीत महिलेची सोनसाखळी हिसकावली – सविस्तर बातमी
शंकर डुबकवाड (वय ५१, रा. बाेराटे वस्ती, खराडी) असे मृत्युमुखी पडलेल्या बांधकाम मजुराचे नाव आहे. या प्रकरणी रमेश वंजारी, सुभाष साकोरे (रा. वडगाव शेरी), तसेच नामदेव गणगोपालवा (रा. बाेराटे वस्ती, खराडी) यांच्याविरुद्ध गुन्हा दाखल करण्यात आला. याबाबत डुबकवाड यांचा मुलगा शिवानंद (वय २२) याने चंदननगर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, वडगाव शेरी भागातील गणेशनगर भागात तीन मजली इमारतीचे काम सुरू आहे. इमारतीच्या तिसऱ्या मजल्यावर डुबकवाड हे रविवारी (१० मे) दुपारी पावणेचारच्या सुमारास काम करत होते. त्या वेळी तिसऱ्या मजल्यावर खडी उतरवित असताना डुबकवाड यांचा तोल गेला. तिसऱ्या मजल्यावरुन पडल्याने ते गंभीर जखमी झाले. त्यांना तातडीने रुग्णालयात दाखल करण्यात आले. उपचारांपूर्वीच त्यांचा मृत्यू झाला होता. घटनेची माहिती मिळताच पोलिसांनी घटनास्थळी भेट दिली. बांधकाम ठेकेदार, तसेच संबधित इमारतीचे बांधकाम करुन घेणाऱ्या मालकांनी सुरक्षाविषयक उपाययोजना केल्या नव्हत्या. नियोजित इमारतीच्या परिसरात संरक्षक जाळी बसविली नव्हती. सुरक्षाविषयक उपाययोजना न केल्याने दुर्घटना घडल्याचे डुबकवाड यांचा मुलगा शिवानंद याने फिर्यादीत म्हटले आहे. सहायक पोलीस निरीक्षक बाबर तपास करत आहेत.
