हडपसर पोलिसांची कारवाई
marathinews24.com
पुणे – शहरातील हडपसर येथील पीएमटी बसथांब्यावर बसची वाट पाहत उभ्या असलेल्या महिलेची सोन साखळी हिसकावून पसार झालेल्या सराईत चोरट्याला हडपसर पोलिसांनी अटक केली. गुप्त बातमीदाराकडून मिळालेल्या माहितीच्या आधारे पोलिसांनी सापळा रचत राहुल नामदेव देडे (वय २१, रा. राजखुडे वस्ती, गोसावी वस्ती, हडपसर, पुणे) याला अटक केली. त्याच्याकडून ३५ हजार रुपये किमतीचे चार ग्रॅम वजनाचे सोन्याचे मंगळसूत्र जप्त करण्यात आले आहे. पोलिसांनी दिलेल्या माहितीनुसार, २३ जून २०२६ रोजी सकाळी सुमारे ११ वाजण्याच्या सुमारास फिर्यादी महिला हडपसर येथील पीएमटी बसथांब्यावर बसची प्रतीक्षा करत उभ्या होत्या. त्याचवेळी दुचाकीवरून आलेल्या एका चोरट्याने क्षणार्धात सोनसाखळी हिसकावून पळ काढला.
सोसायटीच्या आवारात व्यावसायिकाची रोकड हिसकावली – सविस्तर बातमी
घटनेनंतर हडपसर पोलिस ठाण्यात गुन्हा दाखल करण्यात आला होता. गुन्ह्याचा तपास पोलीस अंमलदार महावीर लोंढे व अनिरुद्ध सोनवणे यांना राहुल देडे बद्दल माहिती मिळाली. तो गोसावी वस्तीतील राजखुडे वस्तीत राहत असल्याची खात्री पटताच आरोपीच्या राहत्या घरी छापा टाकून त्याला ताब्यात घेतले. राहुल देडे याने सोनसाखळी चोरी केल्याची कबुली दिली. आरोपीकडून चोरीस गेलेले ३५ हजार रुपये किमतीचे चार ग्रॅम वजनाची सोनसाखळी जप्त करण्यात आली.
या गुन्ह्याचा पुढील तपास सहायक पोलिस निरीक्षक विजय पाटील व पोलीस हवालदार निलेश किरवे करीत आहेत. ही कारवाई वरिष्ठ पोलिस निरीक्षक विश्वजीत काईंगडे, पोलिस निरीक्षक (गुन्हे) निलेश जगदाळे यांच्या सूचनेनुसार सहायक पोलिस निरीक्षक विजय पाटील, पोलीस उपनिरीक्षक सत्यवान गेंड, पोलीस अंमलदार दीपक कांबळे, निलेश किरवे, बापू लोणकर, भाऊसाहेब कटके, अजित मदने, कुंडलिक केसकर, भगवान हंबर्डे, महेश चव्हाण, तुकाराम झुंजार, यांच्या पथकाने केली.
