गुलटेकडी मार्केट यार्डमधील श्री शारदा गजानन मंडळाचा अभिनव देखावा; सामाजिक उपक्रमांची परंपराही कायम
marathinews24.com
पुणे – पुण्यातील गणेशोत्सवाला वैभवशाली परंपरा लाभली असून धार्मिक उत्सवाबरोबरच सामाजिक संदेश देणारे विविध देखावे हे या उत्सवाचे खास आकर्षण ठरत आले आहेत. यंदा गुलटेकडी येथील मार्केट यार्डमधील (Market Yard Ganeshotsav) श्री शारदा गजानन मंडळाने विविध प्रकारची फळे, भाजीपाला, पालेभाज्या आणि कंदमुळे वापरून गणरायाची आकर्षक आरास साकारली आहे.
मार्केट यार्ड हे पुण्यातील फळे आणि भाजीपाल्याच्या व्यापाराचे प्रमुख केंद्र. याच परिसराची ओळख अधोरेखित करत मंडळाने यंदाच्या सजावटीत भाजीपाल्याचा कल्पकतेने वापर केला आहे. (Market Yard Ganeshotsav) विविध पालेभाज्या, मुळा, गाजर, मिरची, वांगी, टोमॅटो, काकडी, भोपळा तसेच अन्य फळे आणि कंदमुळांची कलात्मक मांडणी करत गणरायाचा परिसर सजविण्यात आला आहे. त्यामुळे ही आरास भाविकांसाठी विशेष आकर्षण ठरत आहे.
‘बळीराजाच्या कष्टातून आपल्या ताटात पोहोचणाऱ्या शेतमालाचे महत्त्व समाजापर्यंत पोहोचावे आणि शेतकरी, व्यापारी, कामगार व ग्राहक यांच्यातील नाते अधोरेखित व्हावे,’ असा संदेश या आरासीतून देण्याचा मंडळाचा प्रयत्न आहे.
श्री शारदा गजानन मंडळाने यापूर्वीही गणेशोत्सवाच्या माध्यमातून सामाजिक बांधिलकी जपली आहे. मंडळाने दूरदृष्टी दाखवत टिळक रस्त्यावरील विसर्जन मिरवणुकीला पर्यायी मार्ग उपलब्ध करून देण्यास पुढाकार घेतला होता. त्यामुळे लक्ष्मी रस्त्यावरील मिरवणुकीचा ताण कमी होण्यास मदत झाली. आरोग्य शिबिरे, रक्तदान शिबिरे, गरजू विद्यार्थ्यांना शैक्षणिक साहित्य वाटप आणि विविध सामाजिक प्रबोधनपर उपक्रमही मंडळातर्फे राबविण्यात येतात.
Market Yard Ganeshotsav मार्केट यार्ड परिसरातील व्यापारी, माथाडी कामगार आणि नागरिकांना एकत्र आणत सामाजिक सलोखा आणि एकतेचा संदेश देण्याचे काम मंडळ सातत्याने करत आहे. परंपरा, पर्यावरण, शेती आणि सामाजिक जाणीव यांचा सुंदर संगम साधणारी यंदाची भाजीपाल्याची आरास पुणेकरांचे लक्ष वेधून घेत आहे.
