सुदैवाने कोणतीही जिवीत हानी नाही
marathinews24.com
पुणे – शहरातील गंगाधाम चौकातील असलेल्या गादीच्या कारखान्याला भीषण आग लागल्याची घटना मंगळवारी सायंकाळी घडली. आगीत सुदैवाने कोणतीही जिवीत हानी झाली नाही. मात्र, प्रचंड नुकसान झाल्याचे सांगण्यात आले. दरम्यान, अग्निशमन दलाच्या जवानांनी घटनास्थळी दाखल होऊन आगीवर नियत्रंण मिळविले.
पुण्यात ट्रिपलसीट दुचाकीस्वार रडारवर – सविस्तर बातमी
गंगाधाम चौकात आईमाता मंदिराजवळ व्यावसायिक संजय बोरा यांचे १ हजार फुटामध्ये गोडाऊन आहे. गोडाऊनमध्ये त्यांनी तयार केलेल्या गाद्या ठेवलेल्या होत्या. त्यासोबतच इतर लागणारे साहित्य देखील होते. दरम्यान, मंगळवारी सायंकाळी साडे सहाच्या सुमारास शॉर्ट सर्किट होऊन अचानक गोडाऊनमध्ये आग लागली. मोठ्या प्रमाणात धूर येत असल्याचे दिसताच येथील कामगारांनी याची माहिती अग्निशमन दलाला दिली. गंगाधाम व कोंढवा अग्निशमन दलाच्या जवानांनी घटनास्थळी धाव घेतली. तोपर्यंत आगीने उग्र रूप धारण करत पुर्ण कारखान्याला विळखा घातला होता. जवानांनी पाण्याचा मारा केला. आगीवर काही वेळात नियत्रंण मिळविले. दरम्यान कापूस आणि कपडा असल्याने कुलींग देखील करण्यात आल्याचे अग्निशमन दलाचे अधिकारी कैलाश शिंदे यांनी सांगितले.
