तीन दिवसांत १ हजार २६५ जणांवर कारवाई
marathinews24.com
पुणे – बेशिस्त वाहन चालकांना धडा शिकवण्यासाठी वाहतूक विभागाने कारवाईची मोहीम वेगाने राबवली आहे. नियमभंग करणाऱ्या वाहन चालकांवर कारवाईचा बडगा उगारण्यात आला आहे. मागील तीन दिवसांत ट्रिपल सीट, मॉडिफाईड सायलेंसर आणि ड्रिंक अँड ड्राईव्हविरोधात कडक कारवाई करण्यात आली. तब्बल १ हजार २६५ ट्रिपलसीट वाहन चालकांवर कारवाई करण्यात आली.
खंडणी प्रकरणात तोतया महिला वकील अटकेत – सविस्तर बातमी
ध्वनी प्रदूषणाला कारणीभूत ठरणाऱ्या मॉडिफाईड सायलेंसर असलेल्या २३४ वाहन चालक जाळ्यात सापडले आहेत. संबंधित दुचाकीस्वाराविरुद्ध कारवाई करून सायलेंसर जप्त करण्यात आले. कारवाईतून ५ लाख ७१ हजार रुपयांचा दंड वसूल करण्यात आला. याशिवाय विविध प्रकारचे वाहतूक नियमभंग करणाऱ्या वाहन चालकांकडून ५१ लाख ५४ हजारांचा दंड वसूल करण्यात आला आहे. नाकाबंदी कारवाईत २३४ सायलेंसरसह ८५२ वाहने जप्त करण्यात आली.
शहरातील ३० ठिकाणी नाकाबंदी करून ‘ड्रिंक अँड ड्राईव्ह’विरोधात विशेष तपासणी मोहीम राबविण्यात आली. त्यामध्ये १८६ वाहन चालकांवर गुन्हे दाखल करण्यात आले. वाहतूक शाखेकडून नागरिकांना नियमांचे पालन करण्याचे आवाहन करण्यात आले आहे. मॉडिफाईड सायलेंसरमुळे ध्वनीप्रदूषण वाढत असल्याने त्याचा वापर टाळावा, मद्यपान करून वाहन चालवू नये आणि ट्रिपल सीट प्रवास टाळून सुरक्षित वाहतूक राखावी, असे आवाहन करण्यात पोलिस उपायुक्‍त हिंमत जाधव यांनी केले आहे.
