दुचाकीस्वाराविरुद्ध वानवडी पोलिसांनी केला गुन्हा दाखल
marathinews24.com
पुणे – भरधाव दुचाकीच्या धडकेत रस्ता ओलांडणाऱ्या पादचाऱ्याचा मृत्यू झाल्याची घटना हडपसरमधील वैदुवाडी चौकात घडली. याप्रकरणी दुचाकीस्वाराविरुद्ध वानवडी पोलिसांनी गुन्हा दाखल केला. गंगाराम रामदास मिरेकर (वय ४२, रा. पवार हाईट्स, शंकरमठ, वैदुवाडी, पुणे-सोलापूर रस्ता) असे मृत्युमुखी पडलेल्या पादचाऱ्याचे नाव आहे. याबाबत मिरेकर यांचा भाऊ बाळू (वय ४०) यांनी वानवडी पोलीस ठाण्यात फिर्याद दिली आहे.
अल्पवयीन मुलीच्या शोधासाठी कोंढवा पोलिसांची तत्परता – सविस्तर बातमी
पोलिसांनी दिलेल्या माहितीनुसार, मिरेकर हे शनिवारी (२० जून) सायंकाळी साडेसातच्या सुमारास पुणे-सोलापूर रस्त्यावरुन निघाले होते. हडपसरमधील वैदुवाडी चौकातून ते रस्ता ओलांडत होते. त्यावेळी भरधाव दुचाकीने मिरेकर यांना धडक दिली. अपघातात ते गंभीर जखमी झाले. त्यांना रुग्णालयात दाखल करण्यात आले. उपचारादरम्यान त्यांचा मृत्यू झाला. याप्रकरणी दुचाकीस्वाराविरुद्ध गुन्हा दाखल करण्यात आला असून,पोलीस उपनिरीक्षक लोंढे तपास करत आहेत.
शहर परिसरात गेल्या तीन दिवसात गंभीर अपघातात चौघांचा मृत्यू झाला आहेत. बहुतांश अपघात हे वाहनचालकांच्या बेदरकारपणामुळे घडले आहेत.
