फुरसुंगीतील घटना
marathinews24.com
पुणे – गुन्हेगारी पार्श्वभूमी असलेल्या मित्राच्या त्रासामुळे त्याचा चौघांनी तीक्ष्ण शस्त्राने वार करुन खून केल्याची घटना हडपसरमधील फुरसुंगी भागात मंगळवारी रात्री घडली. या प्रकरणी फुरसुंगी पोलिसांनी चौघांना अटक केली. आकाश उर्फ राणा मोहन कांबळे (वय २३, रा. गंगानगर, फुरसुंगी) असे खून झालेल्या गुंडाचे नाव आहे. या प्रकरणी आदित्य नामेश्वर पिंपळे (वय २०), ओंकार प्रमोद मोरे (वय २३), अरुण अनिल यादव (वय २४), दत्ता व्यंकट गिते (वय २०, चैाघे रा. शेवाळवाडी, हडपसर, पुणे-सोलापूर रस्ता) यांना अटक करण्यात आली.
पुणे पोलीस नियंत्रण कक्षातील गैरहजरी भोवली – सविस्तर बातमी
आरोपींबरोबर असलेल्या एका अल्पवयीनाला ताब्यात घेण्यात आले आहे. आरोपींचा साथीदार पसार झाला असून, त्याचा शोध घेण्यात येत आहे. आकश याची आई रेखा कांबळे (वय ४२) यांनी फुरसुंगी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, आरोपी आणि आकाश हे मित्र आहेत. चार दिवसांपूर्वी त्यांच्यात वाद झाले होते. आकाश मंगळवारी रात्री दहाच्या सुमारास फुरसुंगीतील गंगानगर परिसरातून निघाला होता. त्या वेळी आरोपींनी त्याला गाठले. त्याच्यावर तीक्ष्ण शस्त्राने वार केले. आरोपींनी केलेल्या हल्ल्यात तो गंभीर जखमी झाला. त्याला तातडीने रुग्णालयात दाखल करण्यात आले. पोलीस उपायुक्त राजलक्ष्मी शिवणकर, विवेक मासाळ, सहायक आयुक्त अनुराधा उदमले, पोलीस निरीक्षक राजेश खांडे यांनी घटनास्थळी भेट दिली. पसार झालेल्या चौघा आरोपींना अटक करण्यात आली.
