सायबर चोरट्यांविरुद्ध पोलिसांनी केला गुन्हा दाखल
marathinews24.com
पुणे – सोशल मीडियावर शेअर बाजारातील गुंतवणूक विषयक जाहिरात पाहिल्यानंतर मोठ्या परताव्याच्या आमिषापोटी एका ज्येष्ठ महिलेने मैत्रिणीचे दागिने मोडून आठ लाख रुपयांची गुंतवणूक केली. सायबर चोरट्यांनी गुंतवणुकीवर ७४ लाख रुपयांचा परतावा मिळाल्याचे भासविले. प्रत्यक्षात महिलेला परतावा आणि गुंतविलेली रक्कम परत देण्यात आली. परताव्याचे आमिष महिलेला महागात पडल्याची घटना नुकतीच घडली. याप्रकरणी सायबर चोरट्यांविरुद्ध पोलिसांनी गुन्हा दाखल केला आहे. याबाबत ६५ वर्षीय महिलेने वारजे माळवाडी पोलीस ठाण्यात फिर्याद दिली आहे.
‘ऑनलाइन टास्क’च्या आमिषाने महिलेची फसवणूक – सविस्तर बातमी
पोलिसांनी दिलेल्या माहितीनुसार, तक्रारदार ज्येष्ठ महिला वारजे भागातील अतुलनगर भागात राहायला आहेत. ९ सप्टेंबरला फिर्यादी महिलेच्या मैत्रिणीने समाज माध्यमात शेअर बाजारातील गुंतवणूकविषयक जाहिरात पाहिली होती. शेअर बाजारात गुंतवणूक केल्यास चांगला परतावा मिळेल, असे आमिष चोरट्यांनी जाहिरातीतून दाखविले होते.
त्यानंतर फिर्यादी महिलेच्या मैत्रिणीने जाहिरातीतील मोबाइल क्रमांकावर संपर्क साधला. त्यानंतर चोरट्यांनी महिलेला एक ॲप मोबाइलमध्ये घेण्यास सांगितले. चोरट्यांच्या खात्यात महिलेच्या मैत्रिणीने पैसे जमा केले. तेव्हा ॲपमधील माहितीनुसार महिलेला मोठा परतावा मिळाल्याचे दिसून आले. चोरट्यांनी महिलेला जाळ्यात ओढले. शेअर बाजारात आणखी रक्कम गुंतविल्यास मोठा परतावा मिळेल, असे आमिष दाखविले.
मैत्रिणीकडे पैसे नसल्याने तिने फिर्यादी महिलेकडे पैसे मागितले. त्यानंतर फिर्यादी महिलेने शहरातील प्रसिद्ध सराफी पेढीत जाऊन दागिने मोडले. मैत्रिणीला ९ लाख रुपये दिले. मैत्रिणीने ऑनलाइन पद्धतीने चोरट्यांच्या खात्यात ही रक्कम जमा केली. तेव्हा तिला गुंतवणुकीवर ७४ लाख रुपये परताव्यापोटी मिळाल्याचे भासविण्यात आले. परताव्याची रक्कम तिने काढण्याचा प्रयत्न केला. महिलेने चोरट्यांच्या मोबाइल क्रमांकावर संपर्क साधला. मात्र, चोरट्यांनी टाळाटाळ सुरू केली. फसवणूक झाल्याचे उघडकीस आल्यानंतर महिलेने नुकतीच पोलिसांकडे तक्रार दिली. पोलीस निरीक्षक सुवर्णा हुलवान तपास करत आहेत.
