सभापती युवराज काकडे यांची मागणी
marathinews24.com
पुणे – जिल्हा परिषद कृषी व पशूसंवर्धन विभागांतर्गत राबवल्या जाणाऱ्या थेट लाभ हस्तांतरण (DBT) योजना वेळेत सुरू करणे अत्यंत आवश्यक असून, शेतकरी बांधवांना खरीप व रब्बी हंगामात लागणारी अवजारे, बी-बियाणे आणि इतर निविष्ठा वेळेवर उपलब्ध झाल्यास, ऐन पेरणी किंवा कापणीच्या वेळी याचा लाभ शेतकरी बांधवांना होईल, अशी मागणी, पुणे जिल्हा परिषदेचे कृषी व पशूसंवर्धन सभापती अमोल नलावडे यांच्याकडे, हवेली पंचायत समितीचे सभापती युवराज हिरामण काकडे यांनी केली आहे.
पुणे जिल्हा परिषद शेतकऱ्यांना कृषी व पशूसंवर्धन विभागांतर्गत 75 % अनुदानावर विद्युत मोटार पंपसेट, प्लास्टिक ताडपत्री, PVC पाईप, भातलावणी यंत्र व बॅटरी स्प्रेयर पंप यांसारखी सुधारीत अवजारे पुरवते. तसेच मुक्त संचार गोठा, मिल्किंग मशीन, मुरघास युनिट, गोठा रबर मॅट, कडबाकुट्टी मशीन आणि एकल महिलांना सुधारित जातीचे तलंगा पक्षी व 2 शेळी वाटप. या गोष्टींचे वाटप शेतकरी बांधवांना होऊन शेतातील व शेतीपूरक कामे अधिक सुलभ होण्यास मदत होते.
पुणे जिल्हा परिषदेची थेट लाभ हस्तांतरण (DBT) योजना लवकरात लवकर सुरू करणे संदर्भात सभापती युवराज काकडे यांनी, जिल्हा परिषदेचे कृषी व पशूसंवर्धन समितीचे सभापती अमोल नलावडे यांची भेट घेतली. यावेळी या योजना ऑफलाईन पद्धतीने सुरू करण्याचीही मागणी केली. मागील काही वर्षात ही योजना ऑनलाईन असल्याने, अनेक शेतकरी सर्व्हर डाऊन व इतर तांत्रिक अडचणींमुळे लाभापासून वंचित राहिले होते. ही बाबत सभापती काकडे यांनी सभापती नलावडे यांच्या निदर्शनास आणून दिली.
यावेळी कृषी व पशूसंवर्धन सभापती अमोल नलावडे यांनी हवेलीचे सभापती युवराज काकडे यांचे निवेदन प्राप्त होताच, याबाबतच्या हालचाली अधिक गतिमान करत, पुढील आठवड्यापासून DBT योजना सुरू करण्याच्या प्रयत्न करणार असल्याचे सांगितले.
