चोरट्यांविरुद्ध अलंकार पोलीस ठाण्यात गुन्हा दाखल
marathinews24.com
पुणे – शेअर बाजारात गुंतवणुकीच्या आमिषाने सायबर चोरट्यांनी एका ज्येष्ठ नागरिकाची २९ लाख रुपयांची फसवणूक केली. याप्रकरणी सायबर चोरट्यांविरुद्ध अलंकार पोलीस ठाण्यात गुन्हा दाखल करण्यात आला आहे. याबाबत एका ज्येष्ठ नागरिकाने फिर्याद दिली आहे.
अचानक ब्रेक दाबल्यामुळे दुचाकी घसरली – सविस्तर बातमी
पोलिसांनी दिलेल्या माहितीनुसार, तक्रारदार ७८ वर्षीय ज्येष्ठ नागरिक कर्वे रस्ता परिसरात राहायला आहेत. सायबर चोरट्यांनी त्यांच्या मोबाइल क्रमांकावर संदेश पाठविला होता. शेअर बाजारात गुंतवणुकीचे आमिष चोरट्यांनी त्यांना दाखविले होते. गुंतवणुकीवर चांगला परतावा मिळेल, असे आमिष चोरट्यांनी त्यांना दाखविले होते. सुरुवातीला चोरट्यांच्या खात्यात ज्येष्ठाने काही रक्कम जमा केली. रक्कम जमा केल्यानंतर त्यांना परतावा मिळाल्याचे चोरट्यांनी भासविले. मात्र, प्रत्यक्षात परतावा दिला नाही. चोरट्यांनी त्यांना आणखी रक्कम गुंतविण्यास सांगितले.
चोरट्यांच्या बँक खात्यात त्यांनी वेळोवेळी २९ लाख ३० हजार रुपये जमा केले. रक्कम गुंतविल्यानंतर त्यांना प्रत्यक्षात परतावा दिला नाही. ज्येष्ठाने चोरट्यांच्या मोबाइल क्रमांकावर संपर्क साधला. मात्र, त्यांना प्रतिसाद देण्यात आला नाही. फसवणूक झाल्याचे उघडकीस आल्यानंतर त्यांनी पोलिसांकडे तक्रार दिली. वरिष्ठ पोलीस निरीक्षक सुनीता रोकडे तपास करत आहेत.
