२८ किलो गांजा जप्त
marathinews24.com
पुणे – गणेशोत्सवात शहरात विक्रीसाठी पाठविण्यात येणारा २८ किलो गांजा वाघोली पोलिसांनी जप्त केला. याप्रकरणी धुळ्यातील एका तरुणाला अटक करण्यात आली आहे. त्याच्याकडून गांजा, मोटार असा १० लाख ८६ हजार रुपयांचा मुद्देमाल पोलिसांनी जप्त केला. विलेश धारासिंग पावरा (वय २२, रा. ता. शिरपूर, जि. धुळे) असे अटक करण्यात आलेल्याचे नाव आहे. पावरा याच्यावर अमली पदार्थ प्रतिबंधक कायद्यान्वये (एनडीपीएस) वाघोली पोलीस ठाण्यात गुन्हा दाखल करण्यात आला आहे.
‘एनसीएल’च्या आवारात चंदनाची झाडे चोरणारे अटकेत – सविस्तर बातमी
गणेशोत्सवात शहरात गांजा विक्रीस पाठविण्यात येणार असल्याची माहिती गस्त घालणाऱ्या पोलिसांच्या पथकाला मिळाली. नगर रस्त्यावरील वाघोली परिसरात एका हाॅटेलजवळ पोलिसांनी सापळा लावला. हाॅटेलजवळ मोटार थांबली होती. पोलिसांनी मोटारचालक पावरा याच्या संशयास्पद हालचाली टिपल्या. त्याला चौकशीसाठी ताब्यात घेण्यात आले. मोटारीची तपासणी करण्यात आली. तेव्हा पिशवीत गांजा सापडला. पावरा याच्याकडून दहा किलो गांजा जप्त करण्यात आला. पावरा याने गांजा कोठून आणला, तसेच कोणाला विक्री करणार होता, यादृष्टीने पोलिसांकडून तपास करण्यात येत अहे.
परिमंडळ चारचे पोलीस उपायुक्त सोमय मुंढे, सहायक आयुक्त प्रांजली सोनवणे यांच्या मार्गदर्शनाखाली वाघोली पोलीस ठाण्याचे वरिष्ठ पोलीस निरीक्षक युवराज हांडे, गुन्हे शाखेचे निरीक्षक आसाराम शेटे, उपनिरीक्षक मनोज बागल, पोलीस कर्मचारी रमेश साबळे, बाबासाहेब मोराळे, राम ठोंबरे, प्रदीप मोटे, मंगेश जाधव, सुनील कुसाळकर समीर भोरडे, पांडुरंग माने, विशाल गायकवाड, सचिन कोकरे यांनी ही कामगिरी केली.
