पुणे विभागात अवैध वाळू वाहतूक करणाऱ्यांवर तात्काळ कठोर कारवाईचा इशारा
marathinews24.com
पुणे – राज्यात वाळू तसेच इतर गौण खनिजांचे अनधिकृत उत्खनन, वापर, वाहतूक व तस्करीचे प्रकार रोखण्यासाठी महसूल व वन विभागामार्फत “महाराष्ट्र गौण खनिज (विकास व विनियमन) नियम, २०१३ लागू करण्यात आले आहेत. या नियमांनुसार संबंधित विभागांमार्फत समन्वयाने कठोर अंमलबजावणी करण्यात येत आहे.
महामाता रमामाई आंबेडकर यांच्या नावाने भव्य सांस्कृतिक भवन उभारू : अण्णा बनसोडे – सविस्तर बातमी
राज्य परिवहन प्राधिकरण, पुणे यांनी कळविल्यानुसार वाळू व इतर गौण खनिजांचे अवैध उत्खनन, वापर व वाहतूक करणाऱ्या वाहनांवर मोटार वाहन अधिनियम तसेच त्याअंतर्गत असलेल्या तरतुदींनुसार कठोर कारवाई करण्यात येणार आहे. ही कारवाई पुणे, पिंपरी-चिंचवड आणि बारामती या कार्यक्षेत्रांमध्ये करण्यात येईल.
गुन्ह्यानुसार कारवाईचे स्वरूप पुढीलप्रमाणे ठरविण्यात आले आहे.
पहिला गुन्हा : वाहन अटकाव करून ठेवणे व परवाना ३० दिवसांसाठी निलंबित करणे.
दुसरा गुन्हा : वाहन अटकाव करून ठेवणे व परवाना ६० दिवसांसाठी निलंबित करणे.
तिसरा गुन्हा : वाहन अटकाव करून ठेवणे व परवाना कायमस्वरूपी रद्द करणे.
प्रादेशिक परिवहन कार्यालयांकडून अवैध उत्खनन व वाहतुकीविरुद्ध संयुक्त तपासणी मोहीम राबविण्यात येणार असून, नियमांचे उल्लंघन करणाऱ्यांवर कोणतीही शिथिलता न दाखवता तत्काळ कारवाई करण्यात येईल, असे प्रादेशिक परिवहन अधिकारी, पुणे यांनी प्रसिद्धीपत्रकान्वये कळविले आहे.
