रिक्षा चालक ठार, तिघे जखमी
marathinews24.com
पुणे – भरधाव एसटी बस आणि रिक्षामध्ये झालेल्या भीषण अपघातात रिक्षा चालकाचा जागीच मृत्यू झाला असून, तिघे प्रवासी गंभीर जखमी झाले. ही घटना गुरुवारी सायंकाळी साडेपाचच्या सुमारास कात्रज घाट बोगदा संपल्यानंतर पुण्याकडे येताना दुसऱ्या वळणावर घडली. अपघातात रिक्षा चालक हनुमंत रमेश हंगरगे (वय ४२, रा. बिबवेवाडी) यांचा मृत्यू झाला.
जुन्या वादातून मारहाण करणारा अटकेत – सविस्तर बातमी
राजेश इंगवले (वय ४८), दशरथ निरगुडे (वय ४३) शहाजी लक्ष्मण शिवदे (वय ४१ ) हे तिघे जखमी झाले असून त्यांना तातडीने रुग्णवाहिकेद्वारे रुग्णालयात दाखल केले आहे. याप्रकरणी एसटी चालक जालिंदर विष्णु शिंदे (वय 53, जि. सांगली) याला ताब्यात घेण्यात आले असून त्याची वैद्यकीय तपासणी सुरू आहे.
पोलिसांनी दिलेल्या माहितीनुसार, स्वारगेटहून सांगली जिल्ह्यातील विटाकडे एसटी (MH 10 DT 2697) जात होती. तर खेड शिवापूरकडून स्वारगेटच्या दिशेने रिक्षा (MH 12 GS 9695) येत होती. त्यावेळी कात्रज घाट संपल्यावर बोगद्यातून बाहेर निघताना दुसऱ्या वळणावर दोन्ही वाहनात जोरदार धडक झाली. त्यामुळे रिक्षातील चारही प्रवाशी बाहेर फेकले गेले. अपघातात ते गंभीरपणे जखमी झाले.आंबेगाव पोलिसांनी घटनास्थळी धाव घेत मदतकार्य राबविले.
चारही जखमीना रुग्णालयात दाखल करण्यात आले. उपचार सुरू असताना रिक्षा चालक हनुमंत रमेश हंगरगे यांचा मृत्यू झाला. इतर तिघांवर उपचार सुरू असून, त्यांची प्रकृती स्थिर असल्याची माहिती डॉक्टरांनी दिली. याप्रकरणी एसटी चालक याला ताब्यात घेण्यात आले आहे, दरम्यान, अपघातानंतर कात्रज घाटातील वाहतूक विस्कळीत झाली होती. पोलिसांनी परिस्थिती नियंत्रणात आणली. अपघाताचा पुढील तपास आंबेगाव पोलीस करत आहेत.
