गुन्हे शाखेची कारवाई
marathinews24.com
पुणे – शहरातील रास्ता पेठेत एकाला धमकावून त्याच्याकडील ३० हजारांची रोकड लुटून पसार झालेल्या चोरट्यांना गुन्हे शाखेने अटक केली. चोरट्यांनी लष्कर भागात एकाला लुटल्याचे तपासात निष्पन्न झाले आहे. अस्लम इस्माइल शेख उर्फ बिल्ला (वय २२), रेहान जमील शेख उर्फ रिहान (वय १९, दोघे रा. म्हाडा वसाहत, ससाणेनगर, हडपसर) अशी अटक करण्यात आलेल्यांची नावे आहेत.
कोंढव्यात अल्पवयीनाला हाॅकी स्टिकने मारहाण – सविस्तर बातमी
रास्ता पेठेतील शांताई हाॅटेल चौकात आठवडाभरापूर्वी आरोपी शेख यांनी एकाला अडवून त्याच्याकडील ३० हजारांची रोकड लुटली होती. या प्रकरणी समर्थ पोलीस ठाण्यात गुन्हा दाखल करण्यात आला होता. या गुन्ह्याचा गुन्हे शाखेच्या युनिट एककडून तपास करण्यात येत होता. रास्ता पेठेत लुटमारीचा गुन्हा आरोपी शेख यांनी केल्याची माहिती पोलीस कर्मचारी हेमंत पेरणे आणि नीलेश साबळे यांना तपासात मिळाली. त्यानंतर पोलिसांच्या पथकाने सापळा लावून दोघांना पकडले. चौकशीत आरोपी शेख यांनी रास्ता पेठ, तसेच लष्कर भागातील सरबतवाला चौकात दोघांना लुटल्याची कबुली दिली.
आरोपी अस्लम शेख सराइत असून, त्याच्याविरुद्ध विविध पोलीस ठाण्यात २१ गुन्हे दाखल आहेत. पोलीस उपायुक्त निखिल पिंगळे, सहायक आयुक्त शंकर खटके यांच्या मार्गदर्शनाखाली वरिष्ठ पोलीस निरीक्षक वाहिद पठाण, उपनिरीक्षक राहुल मखरे, निलेश साबळे, हेमंत पेरणे, अनिकेत बाबर, मयूर भोसले, उमेश मठपती यांनी ही कारवाई केली.
