न्यायालयाकडून पोलीस कोठडी
marathinews24.com
पुणे – लेखक डाॅ. संपत जाधव आणि सहकाऱ्यांना पिस्तुलाचा धाक दाखवून मारहाण केल्या प्रकरणी स्वारगेट पोलिसांनी दोघांना अटक केली. न्यायालयाने दोघांना गुरुवारपर्यंत पोलीस कोठडीत ठेवण्याचे आदेश दिले. सारसबाग येथील लोकशाहीर अण्णाभाऊ साठे पुतळा परिसरात आरक्षणाबाबत बैठकीचे आयोजन करण्यात आले होते. ही बैठक संपल्यानंतर डाॅ. जाधव आणि सहकाऱ्यांना पिस्तुलाचा धाक दाखवून मारहाण करण्यात आल्याची घटना नुकतीच घडली. या प्रकरणी स्वारगेट पोलिसांनी पाच जणांविरुद्ध गुन्हा दाखल केला होता.
बारामती विधानसभा मतदारसंघ पोटनिवडणूक-२०२६ बाबत आढावा बैठक संपन्न – सविस्तर बातमी
पसार झालेले आरोपी प्रमोद शांताराम नाडे (वय २६, रा. अप्पर इंदिरानगर, बिबवेवाडी) , प्रवीण पोपट शेलार (वय ३६, रा. सिद्धीटेक काॅलनी, कात्रज ) यांना अटक करण्यात आली. ‘या प्रकरणाचा तपास करायचा आहे. आरोपींनी गुन्हा करण्यासाठी वापरलेले पिस्तूल, तसेच फवारण्यासाठी वापरलेला ‘पेपर स्प्रे’ जप्त करायचा आहे. पसार आरोपींना अटक करायची आहे. आरोपींना पोलीस कोठडी द्यावी’, अशी विनंती सरकारी वकील भाग्यश्री डागळे-संचेती यांनी केली. न्यायालयाने नाडे आणि शेलार यांना गुरुवारपर्यंत (२३ एप्रिल) पोलीस कोठडीत ठेवण्याचे आदेश दिले.
