शेअर बाजारात गुंतवणुकीचे आमिष दाखवून फसवणूक
marathinews24.com
पुणे – शेअर बाजारात गुंतवणुकीच्या आमिषाने फसवणुकीचे सत्र कायम आहे. सायबर चोरट्यांनी वेगवेगळ्या घटनांत ज्येष्ठ नागरिकासह दोघांची १ कोटी २६ लाख रुपयांची फसवणूक केल्याचे उघडकीस आले. याप्रकरणी सायबर पोलीस ठाणे आणि खडक पोलीस ठाण्यात दोन स्वतंत्र गुन्हे दाखल करण्यात आले आहेत.
शेअर आयपीओमध्ये गुंतवणूकीचे आमिष, जेष्ठेला ४१ लाखांचा गंडा – सविस्तर बातमी
धनकवडी भागात राहणाऱ्या एका ५६ वर्षीय महिलेला शेअर बाजारात गुंतवणुकीचे आमिष दाखवून सायबर चोरट्यांनी ८४ लाख ६८ हजार रुपयांची फसवणूक केली. याबाबत तक्रारदार महिलेने शिवाजीनगर येथील सायबर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार महिलेच्या मोबाइल क्रमांकावर गेल्या वर्षी सप्टेंबर महिन्यात सायबर चोरट्यांनी संदेश पाठविला होता. शेअर बाजारात गुंतवणूक केल्यास चांगला परतावा मिळेल, असे आमिष दाखवून चोरट्यांनी महिलेला जाळ्यात ओढले. महिलेने चोरट्यांच्या खात्यात वेळोवेळी ८४ हजार ६८ हजार रुपये जमा केले. पैसे जमा केल्यानंतर महिलेला परतावा देण्यात आला नाही. फसवणूक झाल्याचे लक्षात आल्यानंतर महिलेने पोलिसांकडे तक्रार दिली. वरिष्ठ पोलीस निरीक्षक स्वप्नाली शिंदे तपास करत आहेत.
अशाच पद्धतीने गुरुवार पेठ परिसरात राहणाऱ्या एका ज्येष्ठ नागरिकाची सायबर चोरट्यांनी ४२ लाख रुपयांची फसवणूक केल्याचा प्रकार उघडकीस आला आहे. याबाबत ज्येष्ठ नागरिकाने खडक पोलीस ठाण्यात फिर्याद दिली असून, गुन्हे शाखेच्या पोलीस निरीक्षक शर्मिला सुतार तपास करत आहेत. शेअर बाजारात गुंतवणुकीच्या आमिषाने फसवणुकीचे प्रकार वाढले आहेत. चोरट्यांच्या बतावणीकडे दुर्लक्ष करावे, असे आवाहन पोलिसांकडून करण्यात आले आहे.
