टोळक्याकडून दहशत; अल्पवयीनांसह ५ जणांविरुद्ध गुन्हा
marathinews24.com
पुणे – पद्मावतीतील तळजाई वसाहतीत टोळक्याने दहशत माजवून चार वाहनांची तोडफोड केली. टोळक्याने शस्त्रे उगारुन नागरिकांना शिवीगाळ केली. याप्रकरणी अल्पवयीनांसह ५ जणांविरुद्ध गु्न्हा दाखल करण्यात आला. आशुतोष देडे (वय २०), ओम थोरात (वय २०) यांच्यासह पाचजणांविरुद्ध गु्न्हा दाखल केला आहे. गुन्हा दाखल केलेल्या आरोपींमध्ये अल्पवयीनांचा समावेश आहे. दीपक कुचेकर (वय ४३, रा. महात्मा गांधी वसाहत, तळजाई वसाहत, पद्मावती) यांनी सहकारनगर पोलीस ठाण्यात फिर्याद दिली आहे.
आंदेकर टोळीच्या प्रतिस्पर्धी टोळीतील मोरक्या उदात्तीकरण – सविस्तर बातमी
पोलिसांनी दिलेल्या माहितीनुसार, आरोपी देडे, थोरात आणि साथीदार हे तळजाई वसाहतीत राहायला आहेत. सोमवारी पहाटे साडेचारच्या सुमारास आरोपी आरडओरडा करत वसाहतीत शिरले. ‘आम्ही तळजाई वसाहतीतील भाई आहोत. आमच्या नादाला लागला तर जिवंत सोडणार नाही’, अशी धमकी देऊन वसाहतीत दहशत माजविली. रहिवाशांना शिवीगाळ करुन त्यांनी रस्त्याच्या कडेला लावलेली रिक्षा, तसेच तीन दुचाकींची तोडफोड केली. कुचेकर यांनी आरोपींना जाब विचारला. तेव्हा आरोपींनी त्यांना तीक्ष्ण शस्त्राचा धाक दाखवून जिवे मारण्याची धमकी दिली. पसार झालेल्या आरोपींचा शोध घेण्यात येत असून, पोलीस उपनिरीक्षक शेख तपास करत आहेत.
सिंहगड रस्त्यावरील वडगाव बुद्रुक भागात टोळक्याने रविवारी रात्री दहशत माजवून वाहनांची तोडफोड केल्याची घटना घडली. टोळक्याने वैमनस्यातून एका तरुणावर तीक्ष्ण शस्त्राने वार केले. आठवड्यापूर्वी बिबवेवाडीतील पद्मावतीनगर भागात टोळक्याने वाहनांची तोडफोड केली होती. त्यानंतर तळजाई वसाहत भागात वाहन तोडफोड करण्याची घटना घडल्याने नागरिक दहशतीखाली आहेत.
