येरवडा पोलिसांकडून एकाला अटक
marathinews24.com
पुणे – उधारीवर दारू न दिल्याने वाईन शाॅपमधील कामगाराला बेदम मारहाण करण्यात आल्याची घटना घडली. याप्रकरणी येरवडा पोलिसांनी एकाला अटक केली. रोहित पिल्ले (वय २५, रा. जयजवानगर, लक्ष्मीनगर, येरवडा) असे अटक करण्यात आलेल्याचे नाव आहे. श्रीकांत तानाजी राजगुरु (वय ३८, रा. आझाद आळी, येरवडा गावठाण) यांनी येरवडा पोलीस ठाण्यात फिर्याद दिली आहे. पिल्ले याने केलेल्या मारहाणीत वाईन शाॅपमधील कामगार करण संतोष आहुजा (वय २८) हे जखमी झाले आहेत.
कुंडमळा येथे वेगवान बचावकार्यामुळे ५१ पर्यटकांना सुरक्षित बाहेर काढण्यात यश – सविस्तर बातमी
पोलिसांनी दिलेल्या माहितीनुसार, येरवडा भागातील वाईन शाॅपमध्ये पिल्ले रविवारी (१५ जून) रात्री नऊच्या सुमारास आला. त्याने उधारीवर दारूची बाटली मागितली. वाईन शाॅपमधील कामगार आहुजा याने दारू देण्यास नकार दिल्याने पिल्ले चिडला. त्याने दुकानातील गल्ल्याजवळील काच फोडली. आहुजा यांना लाथाबुक्क्यांनी बेदम मारहाण केली. मारहाणीत आहुजा यांचा दात पडला. गंभीर दुखापत केल्याप्रकरणी पिल्ले याच्याविरुद्ध गुन्हा दाखल करुन त्याला अटक करण्यात आली. सहायक पोलीस निरीक्षक सावंत तपास करत आहेत.
