विश्रांतवाडी पोलिसांनी एका विरुद्ध केला गुन्हा दाखल
marathinews24.com
पुणे – पोलीस अधिकारी असल्याच्या बतावणीने तरुणाची पावणेचार लाख रुपयांची फसवणूक करण्यात आल्याचा प्रकार उघडकीस आला आहे. याप्रकरणी विश्रांतवाडी पोलिसांनी एका विरुद्ध गुन्हा दाखल केला आहे. श्रीनिवास वामन मदने (रा. प्रजासत्ताक काॅलनी, धानोरी, विश्रांतवाडी) असे गुन्हा दाखल केलेल्याचे नाव आहे. याबाबत एका तरुणाने विश्रांतवाडी पोलीस ठाण्यात फिर्याद दिली आहे.
दुचाकी चोर अटकेत, दोन लाखांचा मुद्देमाल जप्त – सविस्तर बातमी
पोलिसांनी दिलेल्या माहितीनुसार, आरोपीशी तक्रारदार तरुणाची ओळख झाली होती. आरोपीने पोलीस अधिकारी असल्याची बतावणी तरुणाकडे केली होती. तक्रारदार तरुणाच्या घराचे काम सुरू होते. हे काम पूर्ण करण्यासाठी परवानगीची आवश्यकता हाेती. प्रांतधिकारी ओळखीचे असल्याची बतावणी आरोपीने तरुणाकडे केली होती. त्यानंतर तरुणाकडून या कामाला परवानगी मिळवून देतो, असे सांगून तीन लाख ७० हजार रुपये घेतले. पैसे घेतल्यानंतर त्याचे काम करुन दिले नाही. पैसे परत मागितल्यानंतर आरोपीने टाळाटाळ सुरू केली. आरोपीने तरुणाला धनादेश दिले. मात्र, खात्यात पैसे नसल्याने धनादेश वटले नाहीत. फसवणूक झाल्याचे लक्षात आल्यानंतर तरुणाने नुकतीच पोलिसांकडे तक्रार दिली. पोलीस उपनिरीक्षक सुडगे तपास करत आहेत.
