दुचाकीस्वार चोरट्यांविरुद्ध गुन्हा दाखल
marathinews24.com
पुणे -मद्य विक्री दुकानात काम करणाऱ्या तरुणाला कोयत्याचा धाक दाखवून चार लाख रुपयांची रोकड लुटून नेण्यात आल्याची घटना मुंबई – बंगळुरू बाह्यवळण मार्गावर नऱ्हे परिसरात घडली. या प्रकरणी दुचाकीस्वार चोरट्यांविरुद्ध गुन्हा दाखल करण्यात आला.याबाबत रोहन रवींद्र कांबळे (वय ३१, रा. इंदू निवास, काळेवाडी,पिंपरी-चिंचवड ) याने नऱ्हे पोलीस ठाण्यात फिर्याद दिली आहे. त्याने दिलेल्या फिर्यादीनुसार, दुचाकीस्वार चोरटा आणि त्याच्याबरोबर असलेल्या साथीदाराविरुद्ध गुन्हा दाखल करण्यात आला आहे.
बँकेत गोंधळ घालून व्यवस्थापकाला शिवीगाळ – सविस्तर बातमी
रोहन एका मद्य विक्री दुकानात कामाला आहे. मद्य विक्री दुकानात जमा झालेली तीन लाख ९९ हजार रुपयांची रोकड घेऊन तो १२ एप्रिल रोजी रात्री बाराच्या सुमारास मालकांच्या घरी देण्यासाठी निघाला होता.मुंबई-बंगळुरू बाह्यवळण मार्गावर नऱ्हे परिसरात दुचाकीस्वार कांबळे याला दुचाकीवरुन आलेल्या दोघांनी अडवले. त्याला कोयत्याचा धाक दाखविला. त्याला जिवे मारण्याची धमकी देऊन ३ लाख ९९ हजार रुपयांची रोकड असलेली पिशवी हिसकावून चोरटे पसार झाले. या घटनेनंतर कांबळेने पोलिसांकडे तक्रार दिली. या घटनेची माहिती मिळताच सहायक पोलीस आयुक्त अजय परमार, वरिष्ठ पोलीस निरीक्षक आसाराम शेटे यांनी घटनास्थळी भेट दिली. पसार झालेल्या चोरट्यांचा माग काढण्यात येत असून, पोलिसांनी बाह्यवळण मार्गावरील सीसीटीव्ही चित्रीकरण तपासले आहे. पोलीस उपनिरीक्षक लिटे तपास करत आहेत.
