वनविभागाकडून खातरजमा करण्याचे काम सुरू
marathinews24.com
पुणे – शहरातील विविध भागात बिबट्या आढळल्याची चर्चा असून, सीसीटीव्ही फुटेजसह फोटो व्हायरल केले जात आहेत. विमानतळ, औंधनंतर आता एनडीए पाषाण रस्त्यावर बिबट्याने सैर केल्याचे सीसीटीव्ही फुटेज व्हायरल झाले आहे. याप्रकरणी प्रत्यक्षात वनविभागाकडून सोमवारपर्यंत (दि.१) बिबट्या आढळल्याची घोषणा केलेली नाही. मात्र खबरदारीच्या उपाय म्हणून वनविभागाने बिबटच्या हालचालींवर लक्ष ठेवण्यासाठी ट्रॅपकॅमेरा लावण्याचे काम सुरू आहे. तसेच बिबट्याला जेरबंद करण्याचे प्राधान्य देण्यात आल्याचे वनविभागाने स्पष्ट केले आहे.
मुख्यमंत्री देवेंद्र फडणवीस यांच्या पुढाकाराने १ लाख दिव्यांगांना कृत्रिम अवयव वितरण – सविस्तर बातमी
एनडीए- पाषाण मुख्य रस्त्यावरील हॉटेल डी पॅलेस परिसरात शनिवारी (दि. ३० ) रात्री साडेबाराच्या सुमारास बिबट्या पाहण्यात आल्याचे बोलले जात आहे. याबाबत माजी नगरसेवक दिलीप वेडे पाटील यांनी बिबट्या फिरत असल्याचे सीसीटीव्ही फुटेज वनविभागाकडे पाठविले आहे. त्यानुसार आता वनविभागाकडून खातरजमा करण्याचे काम हाती घेण्यात आले आहे. विशेषतः नागरिकांनी अनावश्यकपणे रात्री उशिरा बाहेर पडणे टाळावे, लहान मुले व पाळीव प्राण्यांना घराबाहेर एकटे सोडू नये. परिसरात हालचाल करताना सतर्क राहावे. बिबट्या आढळल्यास त्वरित वनविभाग किंवा पोलीस प्रशासनास माहिती द्यावी, असे आवाहन करण्यात आले आहे.
वनविभागाकडून पौड रेंजमध्ये यंत्रणा कार्यन्वित
बिबट्याचे सीसीटीव्ही फुटेज बावधन खुर्द गावातील (पौड रेंज )मधील आहे. त्याठिकाणी कार्यरत असलेले वनविभागाचे कर्मचार्यासह रेस्क्यू टिम, दिलीप वेडेपाटील यांच्यासमवेत बिबट स्पॉट झालेल्या ठिकाणची विभागाने रविवारी (दि.१) सकाळी स्थळपाहणी केली. व्हिडिओ हा तेथील असल्याचे दर्शवून बिबट्याला पकडण्यासाठी ट्रॅप लावण्यात आला आहे. बिबटच्या हालचालींवर लक्ष ठेवणेकामी काम चालू आहे. वनविभाग यंत्रणा बिबट जेरबंद करणे कामात प्रयत्न करीत असल्याचे विभागाने कळविले आहे.
