अज्ञात चोरट्यांविरोधात गुन्हा दाखल
marathinews24.com
पुणे – घरफोड्या करणाऱ्या चोरट्यांचा धुमाकूळ सुरूच असून, मार्केटयार्ड परिसरात चोरट्यांनी बंद फ्लॅट फोडत सव्वा आठ लाख रुपयांचा ऐवज चोरून पोबारा केला आहे. बुधवारी सायंकाळी ही घटना उघडकीस आली असून, सीसीटीव्हीच्या माध्यमातून या चोरट्यांचा शोध घेतला जात आहे. याप्रकरणी मार्केटयार्ड पोलिस ठाण्यात ५६ वर्षीय व्यक्तीने तक्रार दिली आहे. त्यानूसार, अज्ञात चोरट्यांविरोधात गुन्हा नोंद केला आहे.
अपघातात दुचाकीस्वाराचा मृत्यू – सविस्तर बातमी
पोलिसांच्या माहितीनुसार, तक्रारदार हे नंदनवन येथील सुर्यमुखी गणेश मंदिर गणेश सहकारी सोसायटीत राहण्यास आहेत. ते मंगळवारी दुपारी तीनच्या सुमारास त्यांच्या घराला कुलूप लावून कुटूंबियासह बाहेरगावी गेले होते. यादरम्यान, चोरट्यांनी त्यांच्या घराचे कुलूप उचकटून आत प्रवेश केला. तसेच, बेडरूममधील कपाटातून सोन्याचे व चांदीचे दागिने असा एकूण ८ लाख २४ हजार रुपयांचा ऐवज चोरून पोबारा केला. तक्रारदार बुधवारी सायंकाळी साडे सहाच्या सुमारास घरी परत आले असता त्यांना चोरी झाल्याचे दिसून आले. त्यानंतर त्यांनी पोलिसांकडे तक्रार दाखल केली. पोलिसांनी परिसरातील सीसीटीव्हीच्या माध्यमातून पसार झालेल्या चोरटयांचा शोध सुरू केला आहे.
